Luftëtari ndodhet në një situatë të paqartë pas humbjes së fundit në javën përmbyllëse të fazës së parë, ku bluzinjtë u mposhtën 3-1 nga Kastrioti në Fushë-Krujë. Pas kësaj disfate, klubi u përfshi nga një “furtunë” shkarkimesh, duke nisur nga administratori Fotis Kristidhi e deri te stafi teknik, me trajnerin Besmir Shabani në krye.

Edhe pse ka kaluar pothuajse një javë nga momenti i largimeve, në Gjirokastër ende nuk është vendosur për emrat e rinj që do të marrin drejtimin e skuadrës. Aktualisht, ekipi po përgatitet nën drejtimin e Arbër Bistrit, i cili nga trajner i Luftëtari U-17 ka kaluar të zëvendësojë administratorin e larguar dhe njëkohësisht po kryen detyrën e trajnerit të parë. Ndërsa aspekti sportiv dhe organizativ mbetet i turbullt, klubi gjirokastrit ka një arsye për t’u ndier krenar: gjendjen e fushës së stadiumit.

Pas ndërhyrjeve të kryera së fundmi, terreni paraqitet në gjendje optimale, duke u krahasuar me një qilim të gjelbër. Në këtë situatë ndihmon edhe kalendari, pasi dy ndeshjet e radhës zhvillohen në transfertë. Në turin e dytë të Kupës së Shqipërisë, Luftëtari do të përballet me Laçin jashtë fushe, ndërsa fazën e dytë të kampionatit e nisin sërish në transfertë, këtë herë në Peshkopi ndaj Korabit.

PANORAMASPORT.AL

---