Java e 13-të e Grupit B në Kategorinë e Dytë solli lëkundje të forta në majën e renditjes dhe e bëri edhe më të ndezur garën për kreun. Kryesuesit e Orikut gabuan në momentin më të papritur, duke u ndalur në barazim nga Eagle, ndërsa ndjekësit kryesorë, Partizani B dhe Bylis B, reaguan me fitore, edhe pse Butrinti ruajti vendin e dytë pa luajtur.Ashtu si në grupin A, edhe këtu terrenet e rënduara nga reshjet u shndërruan në një pengesë serioze për zhvillimin normal të ndeshjeve, por emocionet dhe lufta sportive nuk munguan. Java e 13-të konfirmoi se Grupi B mbetet një nga më të paparashikueshmit në Kategorinë e Dytë, ku çdo ndalesë mund të përmbysë ekuilibrat dhe çdo javë sjell një histori të re në garën për ngjitjen.

Oriku – Eagle 2-2

Kryesuesit frenohen, Eagle surprizon sërish. Oriku ka gabuar në një moment vendimtar të sezonit, duke mos shkuar më shumë se barazimi 2-2 përballë Eagle. Ashtu si një javë më parë ndaj Partizanit B, kryeqytetasit konfirmuan se dinë të godasin të fortët, duke marrë një pikë me shumë vlerë në transfertë. Barazimi i Orikut shërbeu si një “asist” për ndjekësit direkt, Butrintin, Partizanin B dhe Bylis B, që shpresojnë të afrohen edhe më shumë me kreun. Eagle e mbylli ndeshjen me një lojtar më pak, pasi Sunday u ndëshkua me karton të kuq në minutat e fundit, menjëherë pas golit të barazimit.

Bylis B – Këlcyra 5-0

Ballshiotët pa mëshirë, diferencat duken qartë. Bylis B nuk pati asnjë vështirësi përballë Këlcyrës së vendit të fundit, duke fituar thellë 5-0. Diferencat mes dy ekipeve ishin të dukshme, sidomos duke pasur parasysh se në radhët e ballshiotëve aktivizohen edhe futbollistë të ekipit të parë. Fati i ndeshjes u vendos që në pjesën e parë, ku Bylis B shënoi katër gola dhe në minutën e 14-të ishte tashmë në avantazh të dyfishtë. Duke përfituar nga ndalesa e Orikut, kjo javë i shkon për shtat ballshiotëve, të cilët afrohen ndjeshëm me vendin e parë.

Partizani B – Tomori 1-0

Fitore e vuajtur, por trepikëshi vlen ar. Partizani B mori një fitore të rëndësishme, por të vuajtur, përballë Tomorit. Goli i vetëm i takimit u shënua vetëm pesë minuta nga fundi, duke shpërblyer këmbënguljen e “të kuqve”. Edhe pse në formacion ishin të pranishëm disa lojtarë të ekipit të parë, skuadra e drejtuar nga Ergys Luga e pati të vështirë të çante mbrojtjen beratase. Megjithatë, pas humbjes së papritur ndaj Eagle në javën e kaluar, ky trepikësh ka vlerë të dyfishtë, pasi ngushton distancën me kryesuesit e Orikut.

Delvina – Maliqi 4-0

Një pjesë për t’u harruar, një pjesë për t’u duartrokitur. Takimi mes Delvinës dhe Maliqit pati dy tablo krejt të ndryshme. Pjesa e parë u mbyll pa gola, me lojë të ekuilibruar dhe pak raste shënimi. Por në fraksionin e dytë, delvinjotët shpërthyen. Me një lojë të bukur dhe efikase, vendasit shënuan katër gola, ku spikatën Koshie dhe Akim, duke e kthyer ndeshjen në një shfaqje force. Kjo fitore i ngjit delvinjotët në vendin e pestë të renditjes.

Shkumbini – Devolli 1-1

Penallti e humbur dhe dy pikë të shpërdoruara për peqinasit. Shkumbini ishte skuadra më kërkuese, sidomos në pjesën e parë, por shpërdorimi i rasteve i kushtoi shtrenjtë. Baparape humbi disa mundësi të pastra shënimi, ndërsa portieri Beqiri u bë protagonist për Devollin me pritje vendimtare. Në pjesën e dytë, Hasaj kaloi miqtë në avantazh në minutën e 75-të, por Sulkja barazoi me një goditje perfekte dënimi në minutën e 82-të. Kulmi i emocioneve erdhi në fund, kur Shkumbini fitoi një penallti, por Muangalalo u ndal nga Beqiri, duke i mohuar vendasve fitoren.

 

Kategoria e Dytë

Grupi B

 

Java 13 8 shkurt

Të dielën

Delvina – Maliqi 4-0

Koshie 53’, 77’, Akim 58’, 66’

 Bylis B – Këlcyra 5-0

Gjini 12’, Buraneli 14’, Faisal 34’, Almedia 39’, Akibu 75’

 Oriku – Eagle 2-2

Dalanaj 9’, Llojaj 59’ / Lleshi 29’, Vrapi 90’

Partizani B – Tomori 1-0

Goga 85’

Shkumbini – Devolli 1-1

Sulkja 82’ / Hasaj 75’

 Butrinti-Pushim

 

RENDITJA

                  TOTALI            

Nr EKIPI        N    P    F    B    H    G+/G-

1 Oriku         12   27   8    4    0    23-6

2 Butrinti      11   25   8    1    2    17-7

3 Partizani B   12   24   7    3    2    32-10

4 Bylis B       12   24   7    3    2    22-13

5 Delvina       12   15   5    0    7    18-21

6 Tomori        12   14   4    2    6    15-17

7 Maliqi        11   13   4    1    6    14-17

8 Devolli       12   13   4    1    7    15-25

9 Shkumbini     12   12   3    3    6    17-22

10 Eagle       12   12   3    3    6    16-25

11 Këlcyra      12   5    1    2    9    9-31

*Bylis B – Partizani B 0-3, rezultat në tavolinë nga Disiplina

 

Java 14 15 shtator

Maliqi – Shkumbini

Devolli – Partizani B

Tomori – Oriku

Eagle – Bylis B

Këlcyra – Butrinti

Delvina – Pushim

 

L.Resuli/R.Suli/ A.Dushku- PANORAMASPORT.AL 

---