Në vigjilje të ndeshjes ndaj Laçit, në një intervistë për “Panorama Sport” ka folur kapiteni i Teutës, Blerim Kotobelli. Ky i fundit ka analizuar takimin me Laçin. Kotobelli shprehet se Teuta pas një jave jo të mirë do të kërkojë tri pikët. Kapiteni i bluve shprehet se në këto momente s’do parë renditja, por do marrë ndeshjet një e nga një. Kotobelli thotë se llogaritë do të bëhen në fund të prillit. A është gati Teuta për duelin ndaj Laçit?

Nuk ka ndeshje të lehta, pasi në Superiore çdo rival është i rrezikshëm. Kemi nxjerrë mësimet e duhura nga sfida si ajo me Dinamon dhe po mundohemi të jemi gati për sot. Pas një jave jo shumë të mirë si ajo e kaluara, duhet të marrim tri pikët.

Një trepikësh këtë javë do t’ju bënte shumë punë. Si e shihni?

E dimë që është shumë e rëndësishme, sidomos pas atij barazimi në javën e kaluar. Kemi humbur dy pikë. Duhet të vijojmë të punojmë fort që të arrijmë te suksesi.

Si po e përgatisni këtë ndeshje?

Si për çdo ndeshje. Kujdesemi për aspektin mbrojtës dhe atë sulmues. Normalisht që për të fituar duhen bërë gjërat e duhura. Personalisht jam gati.

Si Teuta dhe Laçi vijnë në këtë ndeshje pas momenteve jo të mira. Sa ua vështirëson kjo dhe a besoni te fitorja?

Sigurisht që për të dyja ekipet është një situatë pak e vështirë. Unë mund të flas për ekipin tim, jo kundërshtarin. Pavarësisht rezultateve jo të mira, në ekip mbizotëron besimi, entuziazmi, që na jep shpresë për ndeshjen e ardhshme.

Cilët janë objektivat tuaj për këtë sezon?

Qëllimi primar është përmirësimi dhe deri më tani ia kemi dalë me sukses. Duhet t’i marrim ndeshjet me radhë e të fitojmë sa më shumë prej tyre. Llogaritë në fund të sezonit do të na tregojnë se çfarë kemi arritur.

ZAMIR QYPI-PANORAMASPORT.AL

---