Tirana nxori në shitje biletat e derbit me Partizanin, nga data 28 nëntor. Tashmë ka kaluar një javë dhe “Panorama Sport” mëson se janë shitur rreth 900 bileta për të gjithë stadiumin “Air Albania”.

Partizani si vend i gjashtë dhe Tirana në vendin e fundit ndahen nga 10 pikë. Kjo formë e shfaqur nga dy klubet e kryeqytetit shikohet si faktori kryesor, për braktisjen e stadiumit në Tiranë.

Kështu janë më pak se një mijë tifozë që duke qenë rreth 48 orë larg derbit, kanë shprehur interes për të mos munguar. Nga tifozeria e Tiranës prapa porte ndërkohë janë shitur 250 bileta, ndërsa për Partizanin prapa porte janë blerë 100 bileta deri tani.

Sfida do të luhet të dielën, në orën 18:00. Ditë plotësisht e përshtatshme ndryshe nga herët e tjera, dhe që pritej të sillte më shumë tifozë.

PANORAMASPORT.AL

---