Klinti Qato ka mbyllur aventurën në Kategorinë e Parë me Tomorin, ku ka spikatur si një prej futbollistëve më të mirë të skuadrës beratase. Jo vetëm me lojën e zhvilluar dhe golat e shënuar, por edhe duke shërbyer me asiste për sulmuesit. Aq sa duke luajtur rolin e protagonistit te beratasit dhe duke treguar në ndeshjen finale ndaj Kastriotit një paraqitje në nivel të lartë me lojën e tij të bukur, të cilën e ka finalizuar edhe me shënimin e një goli nga një goditje dënimi nga jashtë zonës.

Dhe kaq ka mjaftuar që me performancën, jo vetëm të fitonte adhurimin dhe vlerësimin e gjithë stafit drejtues. Më shumë se sa kaq. Ka fituar edhe admirimin e drejtuesve të skuadrës së Laçit, të cilët i kanë bërë ftesë zyrtare për ta pasur në radhët e tyre.

Palët tashmë kanë nënshkruar me mesfushorin e qendrës Klinti Qato një kontratë 3-vjeçare, e cila padyshim që konsiderohet si shumë e suksesshme për mesfushorin e spikatur 23-vjeçar, i cili pas një sezoni në të Parën është rikthyer sërish në Superiore, aty ku do të debutonte për herë të parë në moshën 20- vjeçare në radhët e Teutës. Për të kaluar më pas te Luftëtari. Dhe në fund me Tomorin për një sezon ku tentoi deri në fund rikthimin në Superiore. Menjëherë pasi ka nënshkruar zyrtarisht me skuadrën e tij të re, për “Panorama Sport” mesfushori shtatshkurtër ka folur për aventurën e radhës.

“Prej momentit të parë kur më ndërmjetësuan kalimin te Laçi, të jem i sinqertë që nuk u mendova dy herë. Nuk refuzova, sepse duke njohur rritjen e skuadrës vit pas viti, si dhe ambicien e drejtuesve të saj që me punën e tyre mbështetëse kanë investuar për t’u renditur në mes skuadrave pretendente, aq më shumë dhe me pjesëmarrjen në Europë, ky është shans i madh. Pranova me kënaqësi këtë sfidë të re në karrierën time dhe për këtë më duhet të falënderoj edhe trajnerin e njohur Bledar Sinella, që më sugjeroi Laçin. Nënshkrimi i kontratës 3-vjeçare për mua ka qenë jo vetëm një kënaqësi dhe vlerësim, por edhe një mundësi për të treguar vlerat e mia.

Për t’u rritur edhe më shumë profesionalisht. Do të bëj maksimumin tim që të lë gjurmë dhe të jem protagonist në Laç”, tha lojtari që njihet për organizimin e lojës, teknikën e lartë, por edhe në aftësitë e tij shënuese dhe pasimin e fundit. Qato ka edhe një falënderim për Tomorin dhe Beratin. “Në fund, më duhet të them për respekt dhe mirënjohje, sepse e vlerësoj shumë eksperiencën time në sezonin e kaluar te Tomori. I falënderoj të gjithë për mbështetjen që më kanë dhënë dhe u uroj suksese në sezonin e ri, për t’i pritur pas një viti si kundërshtarë në Superiore”, ka mbyllur i entuziazmuar Qato.

EDI SPAHIU – PANORAMASPORT.AL

NDIQE LIVE "PANORAMA TV"

---