Për dhunën e pretenduar nga tifozët beratas ka reaguar shefi i klubit patosarak, Hiqmet Çela, i cili ka folur për gazetën, duke sqaruar gjithçka, edhe incidentin me anësorin. 

“Klubi ynë hedh poshtë aludimet e klubit kundërshtar për ndeshjen Albpetroli-Tomor. Kishim marrë masat e nevojshme për një ndeshje të kësaj rëndësie. I kemi mirëpritur tifozët beratas, ata janë shoqëruar nga forcat e rendit në tribunën anësore, madje edhe në atë qendrore.

Në dijeninë time, në asnjë qytet nuk ndodh që në tribunën qendrore të ketë vetëm zyrtarë miq e jo vendës. Ndeshja u zhvillua në kushte normale dhe ekipi mik mori fitoren. Tifozët beratas kanë provokuar publikun vendës me thirrje të pahijshme, provokimet e tyre janë shmangur nga ne. I vetmi incident në stadium ishte një gur drejt asistentit të dytë nga një minoren. Klubi ynë i ka dhënë ndihmë me anë të mjekut. Për këtë incident distancohemi dhe i kërkojmë falje publike asistentit. Pas ndeshjes tifozët janë shoqëruar nga policia për të shmangur incidentet.

Në Patos nuk ka pasur kurrë incidente për vite me radhë. Ekipi ynë nuk është përbaltur kurrë, nuk ka marrë asnjë dënim. Ndryshe ka ndodhur me Tomorin, një klub i skandaleve dhe dënimeve të shumta. Ky është dallimi mes Albpetrolit dhe Tomorit. Incidenti që pretendohet nga beratasit ka ndodhur shumë minuta pas ndeshjes dhe 3-4 km larg Patosit dhe këtu përgjegjësia nuk është e klubit”, ka theksuar Çela.

Amarildo Gropa – PANORAMASPORT.AL

NDIQE LIVE "PANORAMA TV"

---