Vasil Shkurtaj shqetëson Flamurtarin përpara ndeshjes së ditës së hënë me Bylisin në stadiumin “Adush Muçaj”. Sulmuesi vlonjat pësoi një dëmtim gjatë ndeshjes së javës së fundit me Elbasanin, që u mbyll në barazim 2-2.

“Panorama Sport”, mëson nga burime pranë klubit se 32- vjeçari ka probleme me muskujt e shpejtësisë. Pritet që sot t’i nënshtrohet një rezonance për të përcaktuar shkallën e dëmtimit. Trajneri Eqerem Memushi dhe stafi teknik shpresojnë të mos ketë ndonjë problem serioz. Gjithçka pritet që të shikohet gjatë ditës së sotme, ku do të shikohet edhe gatishmëria e Shkurtajt. Kontrollet paraprake nuk flasin për dëmtim serioz, por gjithsesi pritet fjala e rezonancës. Antoni Beji është një tjetër shqetësim për Flamurtarin. Nigeriani ka një inflamacion të meniskut dhe ka përfunduar terapinë. Aktualisht po i nënshtrohet vrapimeve dhe ushtrimeve aerobike.

Gjasat janë të kthehet për tri javë dhe të jetë gati për ndeshjet e “play off”-it. Beji u dëmtua fillimisht në ndeshjen me Korabin, ku pati një tërheqje në kofshë. Teksa u kthye nga ky dëmtim pas katër ditësh pësoi edhe atë që quhet degjenerim i meniskut gjatë seancës stërvitore në Pyllin e Sodës. Mësohet se edhe Fabio Hasa do të jetë gati për takimet e “play off”-it. Mesfushori 30-vjeçar ka pasur probleme me ligamentin. Lajm i mirë është se Erjon Vucaj mund të rikthehet javën që vjen, pas dëmtimit të ligamentin të brendshëm. Ndërkohë, është rikuperuar plotësisht Denis Pjeshka , që pati tërheqje muskulore. Kapiteni shkodran mungoi me Elbasanin për shkak të kartonëve, bashkë me Fjoralb Deliajn. Të dy do të jenë gati për ndeshjen me Bylisin.

ERMAL SIKA- PANORAMASPORT.AL

NDIQE LIVE "PANORAMA TV"

---