Pengu Ferrari, 209 mln rrogë pa fituar titullin kampion/ 6 vitet te “Kokëkuqja”, shansi i çuar dëm në karrierën e Fetelit
I vetmi peng i Sebastian Fetelit në karrierë pa dyshim që do të jenë gjashtë vitet e tij të kaluara te Ferrari. Pas katër titujve kampion me Red Bullin, skuderia italiane, e cila nuk arrin që të fitojë Botërorin që prej vitit të largët 2007, me Kimi Raikonenin, besoi se ishte pikërisht gjermani ai që mund të rikthente lavdinë në Itali.
Madje, për ta bërë të vetin 4 herë kampionin e botës, “Kokëkuqja” futi në verën e vitit 2015 edhe modën e pagave stratosferike në Formulën 1, duke qenë se menjëherë pasi mësuan se Fetel do të fitonte 33 milionë euro në vit, të gjithë pilotët e tjerë elitarë kërkuan rritje të pagave të tyre.
Madje, vit pas viti Ferrari i ofronte që të rinovonte, edhe pse shpresat për titull kampion mbetën në fund vetëm shpresa. Ajo që i shpëtoi disa miliona skuderisë italiane ishin vetëm klauzolat për numrin e garave që Sebastian duhej të mbyllte, ato që në vitet 2016 dhe 2017 ia zbritën rrogën deri në 28 milionë euro, por një rebelim i pilotit në 2018-ën, kur skadonte edhe kontrata e parë, bëri që ai të fitonte të drejtën për t’u ngjitur në stratosferë dhe të bëhej piloti më i paguar në histori, falë 45 milionëve në vit (aq është shifra që fiton sot edhe Luis Hamilton te Mercedesi, që e bën pilotin më të paguar aktualisht në Formulën 1).
E thënë ndryshe, Ferrari shpresoi shumë te Feteli, aq sa nuk ngurroi që të derdhë në llogarinë e tij 209 milionë euro në total për 6 vite, por në fund, konstruktori më i famshëm dhe më i rëndësishëm në botë, nuk shkoi shumë më tepër sesa vendi i dytë me pilotin që në fund të këtij sezoni do të tërhiqet.
PANORAMASPORT.AL
NDIQE LIVE "PANORAMA TV"