Pesë pikë në po aq ndeshje përbëjnë nisjen më të dobët të Serisë A nga ana e Romës në dekadën e fundit. Statistikat dënojnë ekipin, por edhe lëkundin fuqishëm stolin e Eusebio Di Françeskos. Ndeshja e nesërme me Frozinonen dhe ajo në fundjavë kundër Lacios mund të jenë vendimtare për fatin e trajnerit, teksa në horizont kanë nisur të duken pasuesit e mundshëm.

Kandidatura – Paulo Soza dhe Loro Blank janë dy emrat e parë që janë përmendur për rolin e trajnerit të verdhekuqve. Konsulenti verdhekuq, Franko Baldini, përflitet se ka nisur kontakte me portugezin, i cili njëkohësisht po diskuton një prishje të kontratës që e lidh me kinezët e Tianzhin. Pasi stërviti Bordon, kombëtaren franceze dhe PSG-në, ish-mbrojtësi i Interit do të ishte entuziast për një aventurë të re, por sidoqoftë duhet pritur sesi do të reagojë skuadra nën urdhrat e Di Françeskos.

Ish-i – Një tjetër emër është ai i Vinçenco Montelës, i mbetur pa punë pas shkarkimit nga Sevija. Për ishsulmuesin do të bëhej fjalë për një rikthim të dyfishtë duke qenë se ka qenë pjesë e kryeqytetasve si futbollist, por edhe si trajner i ekipit të të rinjve. Konte – Pa punë, por i shumëkërkuar edhe Antonio Konte. Ish-tekniku i Çelsit mund të pranojë një stol italian vetëm për t’u rikthyer në atdhe, ku gjithashtu Milani dhe Interi presin “përgjigje” nga trajnerët përkatës përpara se të mësyjnë ndaj Kontes.

NDIQE LIVE "PANORAMA TV"

---