Moshat U-19 / Flamurtari dhe Skënderbeu në “play-off”, vazhdon garë treshe në Grupin A
Të kuqtë e Ylli Shehut likuidojnë Shkëndijën
Partizani ka fituar ndaj Shkëndijës së Tiranës, duke hedhur një hap të sigurt për zonën “playoff”. Pas një pjese të parë disi të ekuilibruar, loja e të kuqve erdhi gjithnjë në rritje në 45 minutat e dyta. Sulmuesit e kuq kanë humbur disa raste për shënim, teksa protagonistë janë bërë Vatnikaj, Bairamaj, Qori e Kumanova.
Në një ditë të mirë ishte kapiteni i Shkëndijës, Luga. Në fillim të fraksionit të dytë, është Junild Vatnikaj, i cili, me një gjuajtje brenda zonës, kalon në epërsi Partizanin. Mirëpo, të kuqtë e Ylli Shehut nuk ndalen me kaq, teksa arrijnë t’i dyfishojnë shifrat me anë të Haxhiut në minutën e 61-të.
Ndërkohë, futja e Balliut te Shkëndija e gjallëroi sulmin, por miqtë nuk mundën të shënonin për të rihapur takimin. Gjithçka u mbyll 2-0, me Partizanin që pothuajse e ka prerë biletën për zonën “play-off”. Nga ana tjetër, Shkëndija luan për prestigj, pasi nuk ka shanse për të qenë në luftën për titull.
ABDULLA DUSHKU
Tirana ndal shkodranët
Vllaznia nuk ka shkuar më shumë se barazimi 0-0 në shtëpi ndaj Tiranës. Ka qenë një ndeshje shumë e luftuar, me dy skuadra që kërkuan fitoren, por në fund ndanë nga një pikë. Ky barazim më shumë u shërbeu kuqebluve, që praktikisht kanë siguruar zonën “play-off”, por natyrisht kërkojnë që ta mbyllin kampionatin në vendin e parë.
ADMIR URUÇI
Komandon Flamurtari
Flamurtari merr një tjetër fitore, këtë herë kundër Elbasanit në shtëpi, duke e mbyllur kampionatin në vendin e parë të grupit B dy javë para fundit të sezonit. Edhe pse ka vuajtur jo pak, ekipi i Resulit e ka zgjidhur ndeshjen me një penallti të kthyer në gol nga Sadushi në minutën e 52-të. Elbasani nuk kishte forca për të reaguar.
KASTRIOT BRAHIMAJ
Shkëlqen Skënderbeu
Skënderbeu i Jani Kaçit ka arritur dje një fitore të madhe në Durrës, duke siguruar zonën “play-off” dhe nxjerr jashtë loje Teutën. Heroi i bardhekuqve të rinj ka qenë Osmanllari, i cili ka shënuar tre gola. Teuta e nisi më mirë lojën dhe kaloi në avantazh me Xhymertin, ndërsa më pas mendoi Osmanllari për të përmbysur gjithçka me një tripletë.
JETON REXHMATI
Mjafton goli i Hotit
Shkëndija e Durrësit ka fituar me rezultatin minimal 1-0 ndaj Besës së Kavajës. Ekipi i Kërçovës kishte mungesa të rëndësishme, por përsëri ka marrë tri pikë sa i përket mbijetesës në Superiore. Golin e vetëm të takimit e shënoi Hoti me një goditje dënimi në minutën e 80-të. Me këtë fitore, Shkëndija largohet me pesë pikë nga Lushnja e fundit.
JETON REXHMATI
Vendosin dy penallti
AF Dinamo u falet golave nga penalltia për të marrë tri pikë shumë të rëndësishme ndaj Pogradecit. Në minutën e 43-të ka pasur një prekje me dorë në zonë dhe Rama ka kthyer në gol penalltinë e akorduar nga gjyqtari Grimci. Ndërsa në minutën e 57-të kemi sërish penallti dhe Rama tregohet i saktë, duke realizuar dhe i dhënë fitoren AF Dinamos.
ABDULLA DUSHKU
Përmbysje e Olimpikut
Olimpiku ka arritur të fitojë bindshëm ndaj Veleçikut, por nuk e ka pasur të lehtë në fushë. Kanë qenë miqtë nga Kopliku ata që shënuan të parët me anë të Popajt. Megjithatë, pa u mbyllur pjesa e parë, është Picari që kthen në gol një penallti, duke barazuar shifrat. Në pjesën e dytë Olimpiku shpërthen, duke shënuar dy herë me Totrakun dhe Picarin.
ABDULLA DUSHKU
Luftëtari, i pandalshëm
Luftëtari ruan vendin e parë në klasifikim, pasi mundi 1-3 në transfertë ekipin e Pepës. Ishte Puci ai që realizoi një dopietë për gjirokastritët, me nga një gol në secilën pjesë. Ndërkohë, për vendësit barazoi përkohësisht Sallaku. Mahmutaj për miqtë hipotekoi fitoren në fund, duke i dhënë tri pikë ekipit të Petraq Meçit.
VLADIMIR MEMA
“Poker” i Dinamos
Dinamo ka triumfuar ndaj Lushnjës, në një ndeshje ku dominoi totalisht dhe u akorduan tri penallti. Skuadra dinamovite ktheu në gol dy 11-metërsha, ndërsa miqtë një. Tabaku dy herë, Alimadhi dhe Dedaj arritën të shënonin për blutë, ndërsa në pjesën e dytë golin e vetëm për lushnjarët e realizoi Korreshi, që goditi saktë nga pika e bardhë.
ABDULLA DUSHKU
