MOSHAT U-17| Grupi A/ Tirana dhe Flamurtari i kthehen fitores, Vllaznia me Shkëndijën e bëjnë 7 “ballë”
Kategoria Superiore për moshat U-17, luajti këtë fundjavë ndeshjet e javës së 14-të, në Grupin A, “Panorama Sport”, ju sjell skedat e ndeshjeve të zhvilluara:
Tirana mund Internacionalin me përmbysje
INTERNACIONAL – TIRANA 1-2
Tirana kryesuese i rikthehet fitores në kampionat, teksa dje mposhti Internacionalin në Pezë-Helmës me shifrat 1-2. Ka qenë një triumf me përmbysje i 17-vjeçarëve të drejtuar nga Migen Memelli. Fillimisht skuadra e Ardi Beharit ka befasuar, duke kaluar në avantazh me anë të Nergutit në minutën e 13-të. Loja ka qenë e ekuilibruar dhe me raste për shënim në të dyja portat. Dejvi Kreka në qendrën e mbrojtjes së Internacionalit dhe Amarildo Karaj në sulmuesin e bardhebluve spikatën në duelin mes tyre.
Pas golit të kapitenit Henrik Nerguti, reagimi i bardhebluve ishte i menjëhershëm pa u mbyllur pjesa e parë. Sina barazoi shifrat me një supergol, duke çuar skuadrat në dhomat e zhveshjes me rezultatin 1-1. Pas pushimit Internacionali e nisi më mirë pjesën e dytë, duke fituar edhe një penallti. Në minutën e 53-të ishte Nerguti që gaboi nga pika e bardhë dhe në këtë moment morën zemër bardheblutë, të cilët përmbysën gjithçka me golin e Nelës.
Abdulla Dushku
Shpërthejnë shkodranët
Vllaznia shpërthen në gola ndaj Dinamos, duke lënë pas humbjen e javës së kaluar në derbin ndaj Shkodrës. Kuqeblutë shënuan plot shtatë gola, ndërsa që në fillim ishin miqtë që kaluan në avantazh me Ismailin, por vetëm 60 sekonda më pas u kundërpërgjigj Spahija. Papaj dhe Perloshaj bënë secili nga një dopietë, ndërsa shënuan edhe Mujaxhiu e Gurra.
Admir Uruçi
Turpërohet Skënderbeu
Shkëndija e Tiranës shkatërron Skënderbeun me shtatë gola, në një ndeshje spektakolare ku Gega u bë protagonist me një tripletë. Skuadra e drejtuar nga Luan Pinari ishte e papërmbajtshme, veçanërisht në pjesën e dytë. Në 45 minutat e para loja ishte e ekuilibruar, duke përfunduar 1-1, por vendësit shpërthyen pas pushimit me 6 gola.
Abdulla Dushku
Flamurtari vuan me Besën
Flamurtari ka fituar përballë Besës, duke ruajtur kreun e Grupit B. Të besuarit e Dritan Resulit shënuan nga një gol për secilën pjesë. Fillimisht realizoi Dhrami në minutën e 19-të, por më pas gjithçka u vështirësua kur Besa barazoi me Jargavanin. Megjithatë, kur u duk se ekipet do të ndanin nga një pikë, Hasanaj nderoi vlonjatët në fund.
Enriko Gabaj
Teuta i falet Hykës
Teuta me tri pikë të arta në Gjirokastër, në një ndeshje të ekuilibruar që u vendos nga goli i Hykës në minutën e 63-të. Durrsakët u treguan më cinikë, ndërsa bluzinjtë shpërdoruan jo pak. Pas disavantazhit, skuadra e Petraq Meçit krijoi disa raste për gol. Në minutën e 87-të Puci doli i vetëm me portierin, por nuk realizoi.
Tomor Shehu
Shkëlqen F.Republic
Derbi mes akademive të Redi Jupit dhe Alban Bushit ka përfunduar me një fitore të thellë të skuadrës që luan në kompleksin e ndërtuar në fshatin Barbas të kryeqytetit. Ergi Hodo dhe Allan Dogjani kanë shënuar nga dy herë secili për Football Republic, ndërsa dy golat e tjerë kanë për autor Rudjon Plakun dhe Rogest Ahmesulajn.
Abdulla Dushku
Shkodra nuk fal në Lezhë
Takimi mes paratërinjve të Briansit dhe atyre të Shkodrës u ka buzëqeshur miqve, të cilët shënuan tre gola në pjesën e dytë dhe rihapën garën për një vend në zonën “play off”. Ndonëse kishte përpjekje nga të dyja skuadrat, fraksioni i parë u mbyll pa gola. Më pas Musaraj, Shpuza dhe Kerrci realizon nga një gol secili.
Preng Gjikola
Partizani bind në Durrës para… finales
Partizani ka arritur të fitojë pastër në sfidën e djeshme ndaj Shkëndijës së Durrësit në transfertë. Në fakt, ishin vendësit ata që e filluan vrullshëm takimin, ku që në minutat e para tentuan të shënojnë, por pa ia arritur qëllimit. Gjithsesi, në minutën e 20-të, të kuqtë goditën pas një aksioni të bukur. Përlala kalon në avantazh Partizanin, duke i dhënë më shumë siguri skuadrës për vazhdimësinë e lojës. Në pjesën e dytë Shkëndija u mundua të reagonte, duke kërkuar me ngulm barazimin, por sulmuesit nuk kanë shënjestrën e duhur. Kur mendohej barazimi, vjen goli i dytë për Partizanin në minutën e 61-të. Këtë herë është Dusha që vulos fitoren e rëndësishme të “demave” të vegjël. Ky triumf i jep moral skuadrës së kuqe në prag të finales së Kupës së Shqipërisë ndaj Tiranës. FSHF ka njoftuar se do të zhvillohet të mërkurën në orën 14:00 në stadiumin “Selman Stërmasi”. Tirana është kryesuese e Grupit A, ndërsa Partizani pozicionohet në vend të pestë.
Zamir Qypi
Pepa shtang Pogradecin
Pepa shtang Pogradecin në shtëpi, duke e mundur thellë 1-4. Ndeshja fillon me një gabim të portierit pogradecar, i cili në përpjekje për të larguar, ia pason kundërshtarit dhe pëson gol nga Gjata. Më pas është Mehmeti që përfiton nga një rrëmujë në zonë dhe dyfishon rezultatin. Në pjesën e dytë ka vend edhe për golat e Gjatës e Mustës.
Redi Dandallaku
NDIQE LIVE "PANORAMA TV"