Moshat U-17 | Blof i Tiranës, Flamurtari super
Çela thyen bardheblutë
Internacionali ndal Tiranën dhe kap vendin e dytë. Skuadra e Elvis Plorit ka merituar fitoren ndaj bardhebluve, duke zhvilluar një lojë më të mirë. Ndeshja është vendosur nga dopieta e Johan Çelës, i cili bëri diferencën në pjesën e dytë. Për bardheblutë, golin e vetëm e shënoi Tabaku. Ekipi i Sulejman Memës luftoi deri në fund, por nuk barazoi
ABDULLA DUSHKU
Përmbysje e Shkëndijës
Shkëndija e Tiranës ka fituar me përmbysje ndaj Partizanit, duke marrë tri pikë të rëndësishme. Loja ka nisur me gol për të kuqtë, teksa Xhafa ka shënuar që në minutën e 3-të. Skuadra e Mjeshtërisë Sportive ka barazuar me Lecin në minutën e 30-të, ndërsa në fraksionin e dytë është Kosmollari, ai që u jep fitoren të besuarve të Luan Pinarit
ABDULLA DUSHKU
Vllaznia bën tris
Vllaznia ka marrë tri pikë të rëndësishme në shtëpi ndaj Portos, duke shënuar tre gola. Kuqeblutë mbyllën llogaritë që në pjesën e parë, teksa shënuan dy herë me anë të Lekajt dhe Lishajt. Në 40 minutat e dyta, Porto u mundua të reagonte, por ishte e pafuqishme për t’u bërë dëm shkodranëve. Afër fundit, Hoxha vulosi fitoren me golin e tretë.
ADMIR URUÇI
Teuta s’fal në shtëpi
Teuta nuk fal në shtëpi, teksa mposhti dje Lushnjën me shifrat e pastra 3-0. Durrsakët kanë dominuar totalisht takimin, duke e mbyllur në gjysmëfushën e tyre kundërshtarin. Me një gol në pjesën e parë me anë të Çiftit dhe më pas Kapllanin dhe Çyrbjen në fraksionin e dytë, skuadra e Kuçit nuk e pati të vështirë për të marrë tri pikët.
JETON REXHMATI
AF Dinamo s’përmbahet
AF Dinamo nuk di të ndalet, teksa ka bërë surprizën edhe në transfertën me Skënderbeun. Skuadra e Ergi Lubanit ka shënuar që në minutën e 17-të me anë të Koxhajt, duke mbyllur pjesën e parë 0-1. E dyta nis me vrull për Skënderbeun, por ata që shënojnë janë sërish miqtë me anë të Muçit. Ndërsa goli i Vangjelit vlejti vetëm për statistikë.
LLAZI SARO
Merko nderon vlonjatët
Flamurtari ruan kreun pas fitores ndaj Dinamos. Ka qenë një ndeshje e vuajtur për vlonjatët, që vetëm në limit kanë arritur të marrin tri pikë. Kuqezinjtë kanë shënuar që në minutën e 15-të me Rrapajn, por ia kanë komplikuar gjithçka vetes me autogolin e Barakut. Megjithatë, pas shumë përpjekjeve, është Merko në shtesë që nderon ekipin e Resulit.
ABDULLA DUSHKU
Elbasani i falet Brakës
Elbasani ka mundur me përmbysje Shkëndijën e Durrësit. Fillimisht miqtë kaluan në avantazh me një autogol të Tetës në minutën e 50-të, ndërsa pas pesë minutash hyn në lojë Braka për verdheblutë. Ky futbollist, në topin e parë që prek, barazon shifrat. Ndërsa një minutë më pas, ai shënon sërish, duke i dhënë tri pikë Elbasanit.
VLADIMIR MEMA
Besa, mjafton një gol
Besa ka mundur Pogradecin 1-0, në një ndeshje ku rastet për gol ishin me shumicë. Ka qenë një lojë, ku kavajasit ishin të orientuar drejt sulmit. Janë disa raste shënimi me anë të Selitës dhe Qarrit, por që nuk japin rezultat. Pjesa e parë mbyllet pa gola, ndërsa me fillimin e fraksionit të dytë, kavajasit gjejnë golin e fitores me Madanin.
FERIZ FERIZAJ
Kukësi gjen fitoren
Kukësi ka mposhtur Olimpikun me shifrat minimale 1-0. Goli i Kovaçit në minutën e 55-të ka vendosur këtë takim. Për 80 minuta, ndeshja ka qenë mjaft e luftuar dhe me emocione të forta. Të dyja skuadrat kanë dhuruar një performancë të mirë, por ka bërë diferencën një gol i Kovaçit, që e çon skuadrën e Agim Belajt në vendin e gjashtë.
SKERDILAID SULOZEQI
Tripletë e Ziajit
Luftëtari fiton ndaj Apolonisë dhe ruan kreun në grupin B. Në debutimin e trajnerit Arbër Bistri, i cili është emëruar në krye të paratërinjve pas largimit të Andrea Çullit, ka menduar talenti Ardit Ziaji, i cili arriti të shënonte tre gola. Fillimisht ishte Mbyeti që kaloi në avantazh Apoloninë, por Ziaji tregoi një formë të shkëlqyer.
TOMOR SHEHU
NDIQE LIVE "PANORAMA TV"