Me “mision” në Berat, “mbreti” i shpërdorimeve te Lushnja: Më ka munguar fati, dua vetëm një gol
Pas 19 ditësh, Lushnja rikthehet në Berat. Ketë herë, për llogari të Kupës së Shqipërisë, ku do të luhet akti i dytë të turit të parë. Një ndeshje që nuk ka interes për lushnjarët, të cilët në “Roza Haxhiu” humbëm me shifrat 0-3. Kjo javë do të jetë e ngarkuar, pasi të dielën do të udhëtojnë edhe në Luz për të matur forcat me Besën për kampionat. Verdhejeshilët kanë shfrytëzuar ndërprerjen për t’u përmirësuar sidomos në sulm.
Krijojnë raste, por finalizimi çalon. “Mbreti” i shpërdorimeve është Hugo da Silva, sulmuesi i afruar gjatë verës. Në një prononcim për “Panorama Sport”, braziliani evidenton se e ka penalizuar fati. “Kam humbur shumë raste dhe kjo nuk është gjë e mirë. Unë jam një sulmues dhe detyra ime është që të shënoj.
E di që pritet shumë nga unë dhe kërkoj vetëm pak fat para portës. Kërkoj vetëm golin e parë. Unë po punoj që të jem golashënuesi i Lushnjës. Shpresoj që ta zhbllokohem”, tha Hugo.
MONE – Arbër Mone beson se autokritika nuk do të vonojë. Mbrojtësi i krahut të majtë për gazetën deklaron se skuadra po rritet dhe shumë shpejt do të vijnë rezultatet. “Ekipi e ka shfrytëzuar ndërprerjen për t’u përmirësuar në të dyja fazat e lojës. Do të luajmë fillimisht ndeshjen e Kupës me Tomorin, që do të na shërbejë edhe për të parë si do të reagojmë pas 10-11 ditësh përgatitje. Kuptohet që vëmendja jonë është e përqendruar te Besa.
Ne vlerësojmë çdo sfidë, por kampionati është prioritet. Jemi duke punuar me qëllimin e vetëm, që ekipi të fitojë pikët e para në transfertë. Lushnja bën një lojë të mirë dhe këtë duhet ta shprehim me rezultate. Ndaj Besës nuk duhet të dalim pa pikë”, përfundoi 33-vjeçari.
ALBAN ALUSHI – PANORAMASPORT.AL
NDIQE LIVE "PANORAMA TV"