“KF Partizani, për sjellje të gabuar të spektatorëve, duke hedhur sende brenda rrethimit të fushës, dënohet me gjobë në masën 50.000 lekë”. Ky është dënimi më i freskët që Komisioni i Disiplinës në FSHF i ka faturuar Partizanit në lidhje me ndeshjen e fundit ndaj Laçit. Ndonëse sendet u hodhën nga tifozët miq, ka qenë Partizani si klub organizator ai që është ndëshkuar me gjobë.

Por, vlera e gjobës së vendosur nga Disiplina për të kuqtë në këtë rast, fsheh në vetvete një manovër që po e përdor rëndomtë ky komision këtë sezon në vendimet e tij. Praktikisht, gjoba 500 mijë lekëshe pranohet apriori nga klubet, pasi ajo është e paapelueshme. Thuhet kështu, pasi nuk ia vlen që të bësh apelim, pasi për të shpresuar që të heqësh këtë gjobë, duhet të paguash 1 milion lekë si tarifë depozitimi të çështjes te Komisioni i Apelit.

Kështu që, gjobat 500 mijë dhe 1 milion janë thuajse të paapelueshme nga klubet, pasi nuk “ia vlen barra qiranë” që të hapësh çështje në Apel. Me sa duket, Disiplina i ka “rënë lapsit”, pasi zakonisht gjobat me frekuencë më të madhe janë 500 mijë dhe 1 milion.

NDIQE LIVE "PANORAMA TV"

---