Kur pritet të luhet Kategoria Superiore dhe dy prej skuadrave historike të saj si Tirana dhe Vllaznia rrezikojnë mbijetesën, skenarët për shpëtimin e tyre janë aq realë, por ndonjëherë edhe të pamundur. Ditët e fundit po flitet gjithmonë e më shumë në lidhje me një premio që kanë vendosur kryeqytetasit dhe shkodranët në favor të Teutës dhe Korabit, e cila shkon në rreth 200 mijë euro.

Dibranët luajnë ndeshjen e radhës ndaj Korabit në kryeqytet. Një gjë e tillë nuk është e paligjshme dhe ata që preken nga kjo janë kurbinasit.

“Nuk jam fare në dijeni dhe as nuk më intereson, pasi shoh vetëm punët e mia. Ne e kemi në këmbët tona gjithçka dhe nuk më interesojnë aspak fjalët e të tjerëve”, kanë qenë fjalët e presidentit të Laçit, Pashk Laska, i cili, edhe pse nuk i ka shumë me qejf deklaratat në media, për “Panorama Sport” thekson se skuadra e tij do të hyjë në fushë ndaj Teutës me objektivin e vetëm për të marrë fitoren dhe siguruar mbijetesën.

“Objektivi ynë në ndeshjen me Teutën është vetëm fitorja dhe nuk më interesojnë fare llafet që thuhen lart e poshtë dhe s’i vendos fare në listë. Po të jemi të zotë të fitojmë, le ta arrijmë. Do bëjmë maksimumin në fushë, ky është interesimi i vetëm që kemi”, ka vazhduar Laska.

PËRGËNJESHTRIMI

Por, përveç premios për kundërshtarët, ditët e fundit ka pasur zëra për një tjetër shpërblim, në favor të vet presidentit Laska. Gjithsesi, ky i fundit e përgënjeshtron me neveri një gjë të tillë.

“Mua apo klubit të Laçit? Unë jam president klubi. Nëse unë do hedh poshtë klubin e Laçit dhe qytetin e Laçit, do jem nga ata ordinerët, pra do të bëhem palë e atyre ordinerëve të tjerë. Nëse klubi i Laçit shitet dhe unë jam palë e atyre, unë i bie të jem ordineri i parë dhe të tjerët vazhdojnë pas meje.

Ne do të bëjmë maksimumin dhe nëse është e mundur do të mbijetojmë, pasi futbolli nuk është me zor. Ne do të bëjmë maksimumin”, vazhdon Laska, që, pasi e falënderojmë për prononcimin, shton: “Thojuni faleminderit edhe atyre që duan të më japin lekë mua. Burra të mirë janë ata që të japin lekë pasi të qëndrojë në Superiore. Ne shohim vetëm interesat e klubit tonë, të tjerët nuk më interesojnë fare”, mbylli presidenti kurbinas.

ARMAND HALILI

NDIQE LIVE "PANORAMA TV"

---