Korrekt dhe asnjë gabim ndaj Realit, Gjimshiti vlerësohet lart për sfidën kurajoze të Atalantës
Megjithëse Atalanta humbi në fund me Realin në ndeshjen e parë të Ligës së Kampioneve, bergameskët morën vlerësime për kurajon dhe vendosmërinë e shfaqur pas momentit kur mbetën me 10 futbollistë që nga minuta e 17-të e sfidës. Titullar në këtë sfidë ishte dhe mbrojtësi shqiptar, Berat Gjimshiti, i cili bëri një paraqitje korrekte ndaj 13-herë kampionëve të Europës.
Edhe pse nga bergameskët spikatën kapiteni Toloi dhe portieri Golini, Gjimshiti bëri detyrën e tij mjaft mirë në rastet kur u përball me lojtarët madrilenë. Ai u vlerësua nga “Sofa Score” me notën 7.1 duke fituar 4 nga 5 duelet individuale me kundërshtarët. Për sa i përket fazës mbrojtëse, mbrojtësi kuqezi kreu 5 spastrime dhe 3 kapje topi, ndërsa dërgoi saktë 4 nga 6 topat e gjatë.
Edhe në Itali, Gjimshiti është vlerësuar për saktësinë dhe korrektësinë e lojës ndaj Realit.
Statistikat e paraqitjes së Berat Gjimshitit ndaj Real Madridit sipas “Sofa Score” për “Panorama Sport”
PANORAMASPORT.AL
