Ish-futbollisti dhe ish-trajneri i kombëtares akuzohet për mashtrim 150 mijë euro
Përsëri probleme me drejtësinë për Altin Rrakllin. Ish-futbollisti i Kombëtares shqiptare të futbollit dhe më pas trajneri i Kombëtares së femrave këtë herë akuzohet për mashtrim, për një shumë prej 150 mijë eurosh, nga Prokuroria e Tiranës.
Gjyqtari Sokol Tona prezantoi sot akuzën për Rrakllin duke e motivuar si “të akuzuar për veprën penale të mashtrimit me pasoja të rënda në dëm të shtetasit Ilir Nasto me shumën 150 mijë euro”.
Por Rraklli nuk ka qenë i pranishëm në këtë seancë dhe nuk është përfaqësuar aty as nga avokati i tij. Seanca ishte shtyrë që nga data 7 prill, por edhe pse Rraklli ishte lajmëruar për ditën e sotme, ka zgjedhur që të mos paraqitet.
Gjyqtari Toma ka kërkuar informacion nga sistemi TIMS për lëvizjet e Rrakllit, i cili ka hequr dorë nga shtetësia shqiptare pak kohë më parë, për të mbajtur vetëm atë gjermane dhe vendbanimin e ka në Gjermani.
Vitin e kaluar, Rraklli përfundoi në shënjestër të drejtësisë austriake, i akuzuar për pjesëmarrje në aktivitet të jashtëligjshëm në favor të basteve sportive.
NDIQE LIVE "PANORAMA TV"