Foto / Legjendat e futbollit grek nderojnë Artur Lekbellon
Legjendat e futbollit grek, pjesëtarët e ekipit që fitoi Euro 2004, kanë qenë sot të pranishëm në ndeshjen miqësore që ekipi i veteranëve të klubit të Arisit zhvilloi me pjesëtarë të asaj përfaqësueseje për të mbledhur fonde për Artur Lekbellon. Ish-futbollisti shqiptar vuan nga një sëmundje e rëndë dhe klubi grek është solidarizuar për të mbledhur fonde nëpërmjet kësaj ndeshje.
Më shumë se 2 mijë tifozë të cilët kishin paguar biletat prej 5 eurosh, ishin të pranishëm në stadium dhe kanë pritur me ovacione Lekbellon, dukshëm i emocionuar për këtë mbështetje të gjerë. Ndërsa presidenti i klubit të Arisit, falënderoi të gjithë këta tifozë për mbështetjen, një urim Lekbëllos i erdhi edhe nga ish-mesfushori Giorgios Karagunis.
“Ju falënderojmë që jeni këtu dhe i urojmë Arturit të gjithë më të mirat” tha ai para kësaj ndeshje ku ishin të pranishëm emra si Nikopolidis, Kirgiakos, Dabizas, Basinas apo Gianakopulos.
