Ka shumë të ngjarë që klubi i Çelsit të zhvillojë një miqësore në Shqipëri pas dy javësh.

Aktualisht skuadra londineze, ku luan Armando Broja, ndodhet në SHBA ku po kryen fazën përgatitore dhe një tur ndeshjesh miqësore, por me sa duket vizita e pronarit të tyre, Tod Bohli, pak ditë më parë në Palasë, ka dhënë “efektet” e para.

Ende nuk është zyrtare, por burime të besueshme bëjnë me dije për “Panorama Sport” se gjigantët anglezë mund të zbarkojnë sërish në kryeqytet. Ndërkaq, edhe kryebashkiaku i Tiranës, Erion Veliaj, deklaroi, mes të tjerave, në mbledhjen e djeshme, se në gusht do të ketë një miqësore të bujshme në kryeqytetin tonë.

“Dëgjova se kemi disa surpriza të reja në gusht, ekipe ndërkombëtare, por nuk jam i autorizuar ta them emrin, do të vijnë të luajë ndeshje miqësore në Tiranë”, tha mes të tjerash kryebashkiaku i Tiranës. Ka shumë të ngjarë që të bëhet fjalë për të njëjtën temë, ardhjen e Çelsit në Shqipëri.

PARTIZANI NË MES – Nuk është përcaktuar ende skuadra me të cilën do të përballet Çelsi, por të dhënat paraprake janë se ata mund të ndeshen në miqësore me kampionët e Shqipërisë, Partizanin. Fakti që në mes janë edhe menaxheri i njohur Fali Ramadani, apo edhe agjenti i Silvinjos, Altin Taho, të bëjnë të mendosh se do të jenë “demat” kundërshtarët e bluve.

Pse? Sepse të dy këta persona lidhjet më të afërta i kanë me drejtuesit e klubit të Partizanit. Por do të ishte edhe logjike që Çelsi të zhvillonte miqësoren me kampionët e vendit tonë.

DIKUR MILANI DHE REALI = Nuk është hera e parë që një klub i madh europian vjen të zhvillojë një miqësore në Shqipëri. Dikur kanë ardhur edhe Milani me Realin e Madridit, ndeshje që asokohe mundësoheshin nga biznesmeni Rezart Taçi. Për disa kohë madje Milani ngriti edhe një kamp fëmijësh për trajnimin dhe seleksionimin e tyre, duke shtuar popullaritetin në radhët e tifozëve shqiptarë. Kujtojmë që pak ditë më parë ishte pronari i Çelsit, Tod Bohli, që zhvilloi një takim me biznesmenë dhe Igli Taren në Palasë.

DENIS LALA-PANORAMASPORT.AL

NDIQE LIVE "PANORAMA TV"

---