EKSKLUZIVE/ Luftëtari zbulon shkresat për çështjen “Rapo”, ja kur u njoftua FSHF dhe Laçi
Luftëtari publikon faktet e çështjes “Donald Rapo”. Klubi gjirokastrit ka zbuluar dje ekskluzivisht për “Panorama Sport” përmes shkresave zyrtare, historinë në këtë fillim viti që ka krijuar përplasjen me Laçin për mesfushorin, i cili deri një muaj më parë ka mbajtur shiritin e kapitenit në ekipin bluzi.
Sapo Luftëtari ka mësuar që Rapo kishte dalë në stërvitje me kurbinasit më 4 janar, menjëherë i dërgoi një shkresë zyrtare lojtarit për t’u ballafaquar. Klubi dispononte foto të futbollistit në stërvitje me Laçin dhe pasi grumbulloi prova të tjera, një ditë më pas i dërgoi një shkresë direkt sekretarit të përgjithshëm të FSHF-së, Ilir Shulku, si dhe vetë klubit kurbinas.
SHKRESA E PARË Më 5 janar 2020, klubi i Luftëtarit i dërgon një shkresë Donald Rapos, për dijeni të FSHF-së, në të cilën shkruhej: “Zoti Rapo, ju keni marrë pjesë në stërvitjen e një ekipi tjetër pa lejen e klubit. Për këtë veprim që cenon imazhin e klubit se jeni një lojtar me kontratë te klubi ynë dhe nuk ju është zgjidhur kontrata, duhet të jepni shpjegim në klub me shkrim ose me gojë brenda orës 12:00 të datës 06.01.2020”. Kjo shkresë është firmosur nga drejtori sportiv, Artur Dadaj.
SHKRESA E DYTË Në datën 6 janar, një tjetër shkresë shkon në drejtim të lojtarit dhe FSHF-së, këtë herë me objektin: masë disiplinore. “Lojtari Donald Rapo nuk është paraqitur në klub për të dhënë shpjegim me gojë ose shkrim, siç dhe e kemi njoftuar për në datën 6 janar deri në orën 12:00. Për prishjen e imazhit të klubit dhe veprimeve të përsëritura të cenimit të rregullores së brendshme, lojtarit Donald Rapo i hiqet e drejta të jetë kapiten i ekipit dhe dënohet me gjobë 2 rroga. Do të stërvitet me ekipin U-19. Ky vendim hyn në fuqi menjëherë”, citohej në masën disiplinore që Luftëtari kishte marrë për kapitenin e skuadrës.
SHKRESA E TRETË Po më 6 janar, klubi i Luftëtarit, pasi kishte marrë një masë disiplinore ndaj Rapos, i dërgoi një shkresë zyrtare FSHF-së për dijeni të sekretarit të përgjithshëm, Ilir Shulku, shefit të sektorit të garave, Lysien Nurishmi. E njëjta shkresë iu dërgua edhe klubit të Laçit, që kishte përfshirë në stërvitje Rapon. “Të nderuar zotërinj, ju vëmë në dijeni se lojtari i ekipit tonë, Donald Rapo, ka lidhur kontratë me klubin Luftëtari nga data 01.08.2019 deri më 30.06.2020.
Kontrata është në fuqi. Në datën 04.01.2020, lojtari ynë është pranuar për të bërë stërvitje me klubin e K.F Laçit pa leje të klubit tonë dhe pa zgjidhur kontratën me klubin ose në organet kompetente. Ekipit tonë me këtë veprim i është prishur imazhi dhe i është cenuar e drejta e pronësisë së një lojtari të saj nga një ekip tjetër i Superligës. Kërkojmë nga ju që të merrni masa dhe kërkoni llogari nga klubi tjetër për cenimin e imazhit tonë dhe dëmit që i është bërë nga një ekip që garon në të njëjtin kampionat, për të përfituar një lojtar në mënyrë të paligjshme. Me respekt, KF Luftëtari”, shkruhej në letrën e klubit.
TOMOR SHEHU
NDIQE LIVE "PANORAMA TV"