Tomori nuk shkoi më larg se barazimi në “Roza Haxhiu”. Përballë një Lushnje që luante me shumë mungesa, beratasit nuk ia dolën dot. Kur e gjetën avantazhin e shpejtë me Mezinin, u duk sikur marrja e trepikëshit do të ishte vetëm një formalitet.

Por, nuk ka ndodhur kështu. Beratasit i kishte të gjitha mundësitë që të dyfishonin shifrat, por sa finalizimi i gabuar, aq edhe bllokada që bën kundërshtarët në prapavijë, e penguan. Me lënien e këtyre dy pikëve, tashmë skuadra e Bledar Sinellës “ndihmon” rivalët e Egnatias, që shkëputen të vetëm në krye të renditjes. Por, kjo ka qenë vetëm e treta javë e luajtur dhe për rikuperimin e pikëve koha është përpara.

Pas këtij barazimi, dje Tomori ka nisur nga puna për ndeshjen e radhës, atë me Pogradecin që do ta luajë në shtëpi. Fitorja, më shumë se mundësi, është një detyrim për skuadrën e Tomorit. Sakaq, me shumë interes po shihet gjendja e Erald Hysenit. Kapiteni u dëmtua në Lushnjë dhe dje nuk u stërvit dot. Drejtuesit shpresojnë te riaftësimi i shpejtë i tij.

EDI SPAHIU-PANORAMASPORT.AL

NDIQE LIVE "PANORAMA TV"

---