ANALIZA/ Bavarezët vuajtën egoizmin dhe bunkerin në mbrojtje
Bajerni i Mynihut fitoi me rezultatin e ngushtë 1-0 në Paris. Një fitore që nuk mjaftoi për t’i dhënë kualifikimin skuadrës gjermane e cila u detyrua të largohej nga Champions-i në fazën çerekfinale.
Një ndeshje e luajtur mirë nga kampionët të cilët ndryshe nga 90- minutëshi i parë, demonstroi një lojë më të balancuar. Gjithsesi, meritat i takojnë edhe PSG-së, e cila arriti të bllokonte në momentet kyçe, sulmet e gjermanëve.
1.PRESINGU
Bajerni mendoi të bënte një presing të lartë duke detyruar kundërshtarin të gabonte. Diçka që ndodhi shpesh te Parisi, i cili në shumë raste dorëzoi topin te gjermanët. Gjithsesi, kjo mënyrë loje shpenzoi shumë energjitë e kampionëve të cilët në pjesën e dytë nuk mbajtën të njëjtin ritëm.
2.MBROJTJA
Parisi mendoi të luante njëlloj si në ndeshjen e parë, i rreshtuar me një 4-4-2 klasik. Kjo për të mbuluar të gjithë fushën dhe për të mos i dhënë mundësinë Bajernit ta sulmonte nga krahët, por duke i detyruar ata të provonin nga qendra. Një mbrojtje kompakte bëri që Myler dhe Çupo Moting ta kishin të vështirë manovrimin në zonën e Navasit.
3.DEPËRTIMET
Poçetino e kishte menduar mirë se si të bllokonte mesfushën bavareze. Lëvizjet në bllok të lojtarëve parisienë nuk u lanë asnjë hapsirë gjermanëve, të cilët e kishin të vështirë të depërtonin në fushën kundërshtare. Edhe nëse e bënin, kjo u kushtonte shumë kohë dhe energji, duke e bërë më të lehtë për rikuperimin e topit nga francezët. Mungesa e Goreckës në qendër u ndie shumë, pasi ai është një nga lojtarët që mund të krijojë hapësira për sulmuesit.
4.PASIMI FINAL
Një defekt i cili u vu re në ndeshjen e së martës ishte edhe pasimi final. Bajerni vuajti vendimmarrjen e saktë në momentin final. Sane në dy raste dhe Koman në një moment ia bënë më të lehtë skuadrës kundërshtare të ruante avantazhin e ndeshjes së parë. Lojtarët e skuadrës gjermane gabuan duke tentuar disa herë të godisnin portën nga jashtë zonë sesa të pasonin për shokët e skuadrës, të cilët ishin në pozicion më të favorshëm për të shënuar.
PANORAMASPORT.AL
NDIQE LIVE "PANORAMA TV"
