E premtja në orën 19:00 nuk do të jetë thjesht një ndeshje futbolli. Përballja mes Vllaznia dhe KF Tirana pritet të rikthejë emocionin e madh të “klasikes” së futbollit shqiptar, aty ku historia, rivaliteti dhe krenaria përplasen në 90 minuta të zjarrta. Por nëse në fushë pritet betejë sportive, në tribuna pritet spektakël i vërtetë.

Tifozeria shkodrane ka dhënë sinjale të qarta se nuk do të mungojë në këtë duel kaq të rëndësishëm. Përkundrazi, burime pranë klubit bëjnë me dije se numri i biletave të shitura është në rritje të vazhdueshme dhe pritet që stadiumi të mbushet në një shifër rekord për këtë edicion. Pavarësisht humbjes së fundit 2-1 ndaj Bylis, mbështetësit kuqeblu duken më të vendosur se kurrë për të qenë pranë skuadrës. Në qendër të kësaj atmosfere pritet të jenë “Vllaznit” ultras, grupimi më i zjarrtë i tifozërisë shkodrane.

Të njohur për koreografitë spektakolare, këngët pa pushim dhe mbështetjen e pakushtëzuar, ata kanë paralajmëruar një mbrëmje të veçantë. Organizimi i tyre për këtë përballje ka nisur prej ditësh, ndërsa në rrjetet sociale është bërë thirrje për prani masive dhe mbështetje maksimale nga minuta e parë deri në të fundit. Fakti që edhe ultrasit e Tiranës kanë konfirmuar pjesëmarrjen në këtë duel e rrit akoma më shumë tensionin pozitiv të sfidës. Rivaliteti mes dy tifozerive është pjesë e pandashme e historisë së kësaj përballjeje dhe shpeshherë tribuna ka qenë po aq protagoniste sa edhe fusha.

Në këto kushte, është e qartë se tifozët shkodranë nuk mund të qëndrojnë pas, por do të përgjigjen me të njëjtin intensitet. Atmosfera elektrizuese që pritet të krijohet në stadium shihet edhe si një shtysë e madhe për futbollistët e Vllaznisë. Në një moment ku skuadra ka nevojë për reagim pas hapit fals të javës së kaluar, prania masive e tifozëve mund të shërbejë si “lojtari i 12-të” në fushë. Historia ka treguar se kur tribuna e kuqebluve ndizet, Vllaznia shpeshherë gjen forcën për të përmbysur çdo parashikim.

E premtja pritet të jetë më shumë sesa një ndeshje kampionati. Do të jetë një provë karakteri për skuadrën, por mbi të gjitha një demonstrim force nga tifozëria shkodrane. Nëse pritshmëritë konfirmohen, kjo “klasike” do të mbahet mend jo vetëm për rezultatin në tabelë, por për jehonën e fuqishme që do të vijë nga tribunat kuqeblu.

PANORAMASPORT.AL

---