Volejbolli i femrave ka nisur dje çerekfinalet e Kupës së Shqipërisë, teksa janë luajtur dy takimet e para të vajtjes. Rezultati më befasues u shënua në palestrën e Farkës, aty ku Lushnja si skuadër pritëse, mori një fitore “të çmendur”, duke përmbysur Partizanin.

Ndonëse në dy sete disavantazh, myzeqaret kthyen gjithçka në favor të tyre, teksa triumfuan me rezultatin 3-2. Një rezultat i çuditshëm dhe krejtësisht i papritur, duke parë edhe diferencat mes skuadrave.

Për sa i përket kronikës së takimit, ndonëse me vështirësi Partizani doli triumfues në dy setet e para, respektivisht në shifrat 22-25 dhe 23-25. Kur dukej se do të kishim një sukses të pastër të kryeqytetaseve, Lushnja bëri befasinë e madhe. Fillimisht lagunaret ngushtuan në 1-2, teksa e fituan setin e tretë 25-17.

Ndërsa më pas vendosën baraspeshë në sete, duke triumfuar 25-21 në setin e katërt. Për të përcaktuar fituesin u nevojit seti final, por edhe aty vajzat e trajneres Erilda Allkanjari u treguan më të sakta, ku fituan 15-12 dhe kompletuan kështu përmbysjen, duke hedhur hapin e parë drejt kualifikimit.

Ndërkohë, në ndeshjen tjetër Tirana vazhdon marshimin, me një ecuri të shkëlqyer. Vajzat bardheblu likuiduan Teutën në Durrës me rezultatin e pastër 0-3.

Një takim pa shumë histori, në të cilin dominimi i Tiranës ishte i jashtëzakonshëm, gjë që pasqyrohet qartë edhe në diferencat e seteve 6-25, 16-25 dhe 14- 25 në favor të kryeqytetaseve. Sot në orën 15:00 do të luhen dy takimet e tjera çerekfinale: Elbasani-Skënderbeu dhe VllazniaBarleti. Në fundjavën e ardhshme do të vijohet me ndeshjet e kthimit.

A.ALUSHI-PANORAMASPORT.AL

NDIQE LIVE "PANORAMA TV"

---