Trukimet, Prokuroria thërret tre futbollistë të Skënderbeut
Rikthehet çështja e trukimeve te Skënderbeu.
Pikërisht në ditën që korçarët luajnë gjysmëfinalen e parë të Kupës së Shqipërisë ndaj Teutës, Prokuroria e Tiranës ka thirrur tre futbollistë për llogari të hetimeve.
Bëhet fjalë për kapitenin Orges Shehi dhe mbrojtësit Marko Radas e Bajram Jashanica, për të cilët organi i akuzës sot ka lëshuar fletë-thirrje për të dhënë dëshmi.
Prokuroria e kryeqytetit ka hapur një hetim në lidhje me këtë cështje që në tetorin e kaluar, kur ka marë në dorëzim edhe raportin e përkthyer të UEFA-s për çështjen në fjalë.
Emrat e tre lojtarëve të mësipërm përmenden edhe në këtë raport, ku arsyetohet pezullimi i klubit korçar për një vit nga Kupat e Europës verën e shkuar.
Ndërkohë, burime nga Prokuroria kanë bërë të ditur se në të ardhmen do të thërriten për të dëshmuar edhe zyrtarë të klubit.
NDIQE LIVE "PANORAMA TV"