Ish-trajneri brazilian i Kukësit, Bylisit dhe Laçit, Marcelo Troisi, i cili në të kaluarën ka bashkëpunuar edhe me Partizanin e Skënderbeun për të afruar lojtarë, përflitet se mund të jetë trajneri i ri i Flamurtarit. Ditën e djeshme ka qarkulluar si lajm se braziliani mund të marrë drejtimin e skuadrës pas largimit të Gerd Haxhiut.

Por, deri tani nuk ka ende një akord mes trajnerit brazilian dhe klubit vlonjat. Stërvitja e ekipit vijon të drejtohet nga Dritan Sadedini. Troisi ka qenë së fundmi trajner i ekipit grek, Kalithea, në Ligën e Dytë. Ndërkohë, vetë administratori Sinan Idrizi ka konfirmuar edhe një herë se nuk do të ketë asnjë të re sa i përket trajnerit të ri të Flamurtarit.

Idrizi theksoi se do të jetë Dritan Sadedini trajner i parë, ndërsa Edmond Liçaj si zëvendës i tij dhe njëkohësisht drejtor klubi. “Trajner i ri i Flamurtarit i emëruar është Dritan Sadedini. Ai do të jetë në krye të pankinës deri në fund të sezonit.

Në krah të djathtë të Sadedinit do të jetë Edmond Liçaj. Pjesën tjetër të stafit do ta mbushim këto ditë. Nuk duhet të nxitohemi për të gjetur pasuesin e Pollozhanit, por së shpejti do ta mbushim edhe këtë boshllëk”, shprehet administratori. Ndërkohë, si përgatitës atletik është rikthyer Theodhoraq Rama.

PANORAMASPORT.AL

NDIQE LIVE "PANORAMA TV"

---