“O burr, po ku je more”/ Këngë dhe përshëndetje shqip, Daku i bën pritje speciale sulmuesit që u transferua për shifrën rekord (VIDEO)
Klubi rus i Rubin Kazanit, pas Mirlind Dakut, ka afruar në radhët e tij një tjetër sulmues shqiptar. Pikërisht bëhet fjalë për 22-vjeçarin Dardan Shabanhaxhaj, i cili në këtë merkato dimërore ka kaluar nga sllovenët e Muras te klubi rus.
Ka qenë pikërisht, sulmuesi i Kombëtares shqiptare, Mirlind Daku, i cili i ka bërë pritje speciale futbollistit të ri shqiptar Shabanhaxhaj.
Në faqen e klubit në rrjete sociale, është publikuar një video në të cilën shfaqet Daku teksa e pret me këngë shqip të Dafina Zeqirit.
“O burrë, po ku je more! Hajde se qe sa duke të pritë”, dëgjohet Daku teksa i thotë Shabanhaxhajt, para se të nisin të dëgjojnë dhe këndojnë bashkë.
Në media të ndryshme sllovene është bërë e ditur se Rubin Kazan ka pranuar t’i paguajë 1.2 milionë euro Muras për të fituar shërbimet Shabanhaxhajt. Sulmuesi 22-vjeçar ka nënshkruar kontratë për katër vite e gjysmë, ndërsa do të veshë fanellën me numrin 99.
Shabanhaxhaj ka shënuar shtatë gola dhe ka kontribuar me tre asistime në 19 ndeshje në elitën e futbollit slloven.
Sulmuesi konsiderohet si një kandidat potent për të veshur fanellën e Kombëtares shqiptare. Kalimi i 22-vjeçarit nga klubi slloven në rusi është bërë me ndërmjetësimin e menaxherit Shkumbin Qormemeti, i cili në të shkuarën ka kryer disa transferime “big” të futbollistëve shqiptarë në klube të ndryshme europiane.
Welcome, Dardan! ❤️? pic.twitter.com/GHbYzF0qWr
— «Рубин» Казань (@fcrk) January 25, 2024
PANORAMASPORT.AL