Lushnja stërvitet pas portave, kryetari i bordit: Është pjesa më e mirë
Investimi që po bëhet në stadiumin “Roza Haxhiu” si kusht nga sektori i licencimeve në FSHF, që impianti lushnjar të plotësojë kriteret e Superiores, ka sjellë një situatë të pazakontë në klubin lushnjar. Skuadra verdhejeshile mund të jetë i vetmi ekip në botën e futbollit që nuk ka një fushë stërvitore në kushte normale.
Duke qenë se ambientet e brendshme të stadiumit “Roza Haxhiu” po ristrukturohen dhe terreni i impiantit pret tapetin e ri, skuadra verdhejeshile jo vetëm që nuk ka se ku të stërvitet, por nuk ka dhe ambiente ku të bëhet gati për stërvitje. Nënkryetari i Bashkisë së Lushnjës, Gentian Nushi, që është njëherësh kryetari i bordit të “KF Lushnja 1930 sh.a”, për gazetën “Panorama Sport” shprehet:
“Gjatë fillimit të punimeve në stadium është hequr tapeti ekzistues dhe pjesët më të mira të tij janë vendosur pas dy portave. E bëmë kështu për t’i shërbyer skuadrës. Veç kësaj po shohim edhe ndonjë mundësi tjetër”, është shprehur kryetari Nushi. Ndërkohë që investimi në stadiumin “Roza Haxhiu” vijon me ristrukturimin e ambienteve të brendshme. Është izoluar tarraca e tribunës qendrore, ndërkohë që pritet të kryhen punime edhe në ambientet e jashtme, plotësimi i tribunës me stola, vendet për mediat etj. Nuk ka filluar ende rikonstruksioni i shkallëve dhe i sheshpushimeve ku lëvizin tifozët.
“Po kryhet investimi në stadium për të plotësuar kriteret që kërkon Kategoria Superiore. Po punohet dhe së shpejti Lushnja do të ketë një stadium të superiores”, tha Nushi. Drejtuesit e Bashkisë kanë vendosur si objektiv për skuadrën verdhejeshile qëndrimin në Kategorinë Superiore.
“Objektivi i skuadrës është qëndrimi në elitë. Të bëjmë një paraqitje të mirë duke synuar që të mos jemi kalimtarë në Kategorinë Superiore”, u shpreh nënkryetari i Bashkisë së Lushnjës, Gentian Nushi.
Alban Alushi
NDIQE LIVE "PANORAMA TV"