Partizani ka vijuar edhe dje përgatitjet për ndeshjen e parë me Krasnodarin, që do të luhet më 18 gusht në Rusi. Mungesat në krahun e majtë të mbrojtjes, ku Kalari është i pezulluar dhe i riu Hakaj i dëmtuar, e detyrojnë trajnerin Adolfo Sormani të bëjë eksperimentin e radhës në këtë rol.

Prova që kreu me Atadën në Austri ndaj Salzburgut nuk doli e suksesshme, kështu që trajneri italian ka nisur të mendojë për një variant të ri. Nga ajo që është parë në seancën e djeshme, eksperimenti i radhës do t’i habisë të gjithë, pasi bëhet fjalë për pozicionimin e Emiljano Vilës si mbrojtës i majtë.

Në të shkuarën lojtari durrsak ka luajtur si sulmues i dytë, por në takimin ndaj Salzburgut në “Elbasan Arena”, pas daljes me të kuq të Kalarit, ai u spostua si mbrojtës i majtë. Me Filin e Torasën krahët e mesfushës konsiderohen të plotësuara, kështu që në disa raste Sormani e ka aktivizuar Vilën në qendër të mesfushës. Por, me sa duket, tani ka ardhur radha që mesfushori me tipare sulmuese të provojë një rol të ri.

Gjithsesi, ky nuk është verdikti përfundimtar nga ana e trajnerit Sormani. Duke pasur edhe tri ditë kohë në dispozicion, italiani kërkon që me eksperimente të gjejë zgjedhjen e duhur në të majtë të mbrojtjes. Nëse deri dje ka pasur shumë pikëpyetje për prezencën e Ramadanit dhe Ibrahimit në Rusi, sot pritet që stafi teknik të marrë një lajm të mirë, pasi dy kosovarët parashikohet të jenë të gatshëm për të enjten.

Me konfirmimin e këtyre dy lojtarëve, trajneri Sormani do të ketë më shumë alternativa përzgjedhëse dhe pritet që sot të provojë edhe njëmbëdhjetëshen e mundshme për transfertën e Krasnodarit. Në dallim nga përballja e fundit me Salzburgun, Batha dhe Torasa duken në formë, pasi i kanë kaluar problemet fizike

NDIQE LIVE "PANORAMA TV"

---