Një ngjarje e rëndë ndodhi paraditen e sotme në ambientet e kompleksit “Skënder Halili”. Trajneri i 17-vjeçarëve të Tiranës, Migen Memelli, u sulmua me thikë, nga prindi i një futbollisti. Për fat të mirë nuk pati të lënduar dhe trajneri i bardhebluve arriti t’i shmangej agresorit.

Prindi A.C u shoqërua në komisariat dhe po procedohet në gjendje të lirë. Në një prononcim për “Panorama Sport”, pas sulmit trajneri Memelli u shpreh:

“Jam i tronditur nga sulmi. Ende nuk e kam marrë veten pas asaj që ndodhi. Ngjarja ka ndodhur rreth orës 9 të paradites. Kishim ndeshje miqësore me Tiranën B. Në momentin e ndërrimit, futbollisti A.Ç u largua nga fusha i nervozuar. Pak minuta më pas ka mbërritur babai i futbollistit, Abdyl Çejku, i cili me goditi me grusht dhe më pas nxorri një biçak të vogel dhe më tha: “Të pres fytin”!

Më pas lajmërova policinë. Fatmirësisht nuk kam dëmtime. Kam bërë deklaratë në polici dhe tashmë i takon policisë të merret me këtë çështje. Këto ngjarje ndodhin mos aktivizimin e fëmijë. Fëmija i tij është trajtuar më mirë se kushdo tjetër. Ka qenë kapiten i skuadrës. Ka qenë i rëndësishëm. Ofendonte gjithmonë, nuk ka qenë në linjë me lojtarët e tjerë. Në shumicën e rasteve, kjo mirësia kthehet për keq.

Duhet te ngremë zërin, i ndodhi Nestit dhe mua, por të paktën te mos e kalojmë ne heshtje, qe në të ardhme mos na behet askush martir”, u shpreh Memelli për “Panorama Sport”.

ADELA MERKO

NDIQE LIVE "PANORAMA TV"

---