Duket se komunikimet përmes telefonit nuk i mjaftonin. Një trajner i Kategorisë së Tretë në Lombardi vendosi të vishej si prift për të qenë pranë ekipit të tij në një ndeshje të konsideruar jetike kundër ASD Galgagnano.

Ngjarja e pazakontë, e ndodhur më 26 tetor, pati si protagonist trajnerin e Union Mulazzano, Matteo Ciceri, i cili tentoi të shmangte pezullimin duke përdorur një maskim të çuditshëm. Para ndeshjes ai mblodhi lojtarët, dha udhëzime nga pankina, dhe sikur të mos mjaftonte kjo, vendosi edhe të hynte në fushën e lojës.

Aty goditi një lojtar kundërshtar dhe festoi golin e barazimit të përkohshëm, duke ofenduar ekipin rival. Sjellja e tij nuk mund të kalonte pa u vënë re. Pas disa ditësh dhe një hetimi të gjatë, erdhi edhe vendimi përfundimtar: pezullim prej katër muajsh, gjobë, si dhe ndëshkim për presidentin e klubit, Raffaele Ranauolo.

PANORAMASPORT.AL

---