Arli Përgjoni është zyrtarisht një lojtar i Sherif Tiraspolit në Moldavi. Mesfushori 23-vjeçar shqiptar ka hedhur hapin e parë jashtë futbollit shqiptar, duke firmosur me klubin moldav, ku synon të vazhdojë rritjen e tij profesionale. Në intervistën e parë si futbollist i Sherifit, Përgjoni tregoi arsyet që e bindën të pranonte ofertën, foli për përshtatjen në skuadrën e re, objektivat e sezonit dhe emocionet para debutimit të mundshëm në kupat e Europës.

Pse vendose të ndryshosh për herë të parë vendin dhe klubin, pikërisht për Sherif Tiraspolin?
Para së gjithash dua ta falënderoj klubin për mundësinë që më dha të mbroj ngjyrat verdhezi. Për mua ky është një hap shumë i rëndësishëm në karrierë dhe shpresoj të tregoj këtu cilësitë e mia më të mira. E njoh Sherifin prej kohësh. Është një klub i madh me histori të pasur dhe ambicie të larta. Kam parë ndeshjet e ekipit në Ligën e Kampionëve dhe kam ndjekur paraqitjet e tij në arenën ndërkombëtare. Përveç kësaj, futbollistët shqiptarë që kanë luajtur këtu para meje kanë folur shumë mirë për klubin dhe kushtet që ofron për zhvillimin e lojtarëve. Prandaj, kur mora ofertën, e kuptova menjëherë se doja ta shfrytëzoja këtë mundësi.

Si e zgjodhe rrugën e futbollistit profesionist?
Një rol të madh ka luajtur babai im. Ai gjithmonë e ka dashur futbollin dhe ka ëndërruar të bëhej futbollist profesionist, por jeta mori një tjetër drejtim. Megjithatë, ai bëri gjithçka që të më ndihmonte mua të realizoja këtë ëndërr. Që nga fëmijëria më ka mbështetur, i ka kushtuar shumë vëmendje zhvillimit tim dhe ka qenë gjithmonë pranë meje. Sot është krenar për atë që kam arritur. Ne vazhdojmë të flasim shpesh për futbollin, analizojmë ndeshjet dhe paraqitjet e mia. Ndonjëherë është mjaft kërkues dhe kritik, por kjo më ndihmon të bëhem më i mirë. Për mua ai mbetet burimi kryesor i frymëzimit.

Si po shkon përshtatja jote në ekipin e ri?
Gjithçka po shkon shumë mirë. Që në ditët e para jam ndjerë rehat. Jam pritur shumë mirë nga grupi, shokët e skuadrës më kanë ndihmuar të përshtatem, ndërsa stafi teknik është gjithmonë i gatshëm të më këshillojë dhe mbështesë. Këtu janë krijuar të gjitha kushtet për punë profesionale. Procesi stërvitor është i organizuar në nivel të lartë dhe kjo e bën adaptimin më të shpejtë dhe më të lehtë.

Çfarë objektivash i vendos vetes dhe skuadrës për të ardhmen e afërt?
Për momentin mendoj para së gjithash për objektivat e ekipit. Sherifi është një klub që lufton gjithmonë për vendet e para, ndaj synimi ynë kryesor është të fitojmë titullin kampion. Gjithashtu na presin ndeshje të rëndësishme në kupat e Europës, ku duam të përfaqësojmë sa më mirë klubin dhe tifozët tanë. Për të arritur këto objektiva nevojiten uniteti i grupit, përgatitja fizike, mentaliteti i duhur dhe përkushtimi maksimal i çdo futbollisti. Natyrisht, edhe pak fat nuk bën kurrë keq në futboll.

Si e sheh konkurrencën për një vend në formacion?
Shumë pozitivisht. Pa konkurrencë është e pamundur të përparosh. Çdo futbollist duhet të tregojë nivelin e tij çdo ditë në stërvitje dhe në ndeshje. Pikërisht lufta për një vend në formacion të ndihmon të rritesh, të përmirësosh cilësitë e tua dhe të bëhesh më i fortë. Për këtë arsye e shoh konkurrencën si një motivim shtesë.

Cilat janë tre cilësitë e tua më të forta në fushë?
Mendoj se janë inteligjenca në lojë, aftësia për të fituar duelet për topin dhe shpejtësia. Përpara janë ndeshjet e kupave të Europës.

Çfarë pritshmërish ke nga debutimi i mundshëm në arenën ndërkombëtare dhe çfarë duhet të bëjë Sherifi për të kaluar turin e parë?
Na pret një përballje e vështirë me NK Aluminij. Është një kundërshtar serioz që nuk duhet nënvlerësuar. Megjithatë, kam shumë besim te skuadra jonë dhe mendoj se kemi gjithçka që duhet për të arritur suksesin. Te Sherifi janë grumbulluar futbollistë cilësorë, ndërsa intensiteti i stërvitjeve tregon nivelin e lartë të kërkesave dhe përgatitjes. Kemi një mbrojtje të fortë, sulm të shpejtë dhe kalime të organizuara nga mbrojtja në sulm. Nëse tregojmë cilësitë tona më të mira, luajmë me disiplinë dhe si një ekip i bashkuar, mund ta arrijmë objektivin dhe të kualifikohemi në raundin tjetër.

PANORAMASPORT.AL

---