Tri tituj kampionë radhazi nuk vijnë rastësisht. Përtej organizimit të klubit, cilësisë së organikës dhe punës së stafit teknik, Egnatia ka pasur një armë të fortë në sezonin e fundit: mesfushën.

Pikërisht aty ku janë fituar shumica e betejave, rrogozhinasit kanë gjetur stabilitetin dhe ekuilibrin që i çoi drejt një tjetër trofeu. Shifrat e platformës së specializuar “Sofascore” e konfirmojnë më së miri këtë fakt. Tre futbollistët me vlerësimin më të lartë në skuadër janë pikërisht mesfushorët Fernando Medeiros, Alessandro Albanese dhe Albano Aleksi, një tregues i qartë se zemra e Egnatias ka qenë në mesin e fushës.

FERNANDO SI LIDER – Me notën mesatare 7.35, Fernando Medeiros rezulton lojtari më i vlerësuar i Egnatias gjatë sezonit. Braziliani ka qenë pika e referimit në organizimin e lojës, duke kombinuar cilësinë teknike me punën e madhe në fazën mbrojtëse dhe atë sulmuese. Ai ka qenë një nga futbollistët më konstantë të skuadrës dhe shpeshherë ritmi i lojës së Egnatias ka kaluar nga këmbët e tij. Jo rastësisht, ai kryeson renditjen e vlerësimeve individuale.

ALBANESE & ALEKSI – Pas Fernandos renditen Alessandro Albanese me notën 7.14 dhe Albano Aleksi me 7.11, duke kompletuar një treshe që ka mbajtur mbi supe kampionatin e gjatë të rrogozhinasve. Albanese ka qenë një element shumë i rëndësishëm në tranzicionet e skuadrës dhe në ndërtimin e aksioneve, ndërsa Aleksi ka sjellë eksperiencë, qetësi dhe ekuilibër në repartin e mesfushës, duke qenë shpesh pika lidhëse mes mbrojtjes dhe sulmit. Fakti që tre lojtarët më të vlerësuar të skuadrës janë mesfushorë tregon qartë se forca e Egnatias ka nisur pikërisht nga qendra e fushës.

BOSHTI I SKUADRËS – Pikërisht rreth kësaj tresheje pritet të ndërtohet edhe boshti i Egnatias për sezonin e ri. Trajneri Nevil Dede synon të ruajë stabilitetin në repartin që ka prodhuar më shumë siguri gjatë sezonit të kaluar, duke e konsideruar mesfushën si pikën më të fortë të ekipit. Objektivi është që kjo bazë të mbetet e paprekur si për ndeshjet e kampionatit, ashtu edhe për sfidat e rëndësishme në kupat e Europës. Sigurisht, merkatoja mbetet e hapur dhe interesi për disa prej futbollistëve të Egnatias nuk mungon. Megjithatë, Fernando Medeiros, Alessandro Albanese dhe Albano Aleksi janë të gjithë nën kontratë me klubin dhe largimi i tyre mund të ndodhë vetëm në rast se mbërrijnë oferta që bindin drejtuesit rrogozhinas. Për momentin, gjithçka të çon te ideja se Nevil Dede do të ndërtojë Egnatian e sezonit të ri pikërisht mbi këtë treshe, e cila me paraqitjet dhe shifrat e saj ka treguar se ishte motori i suksesit të kampionëve të Shqipërisë. Nëse boshti do të mbetet i pandryshuar, atëherë rrogozhinasit do të kenë një bazë solide për të synuar një tjetër sezon të suksesshëm si në Superiore, ashtu edhe në arenën europiane.

VLADIMIR MEMA-PANORAMASPORT.AL

---