Pësimi i katër golave në Vlorë ishte njëra ndër humbjet më të thella të Kastriotit në këtë sezon në Superiore. Deri në minutën kur u pësua goli i parë, krutanët po luanin mirë, por pasi pësuan, morën një goditje të rëndë dhe nuk arritën më as të mbroheshin dhe as të sulmonin, duke pësuar plot katër gola.

Skuadra ditën e djeshme është lënë pushim, ndërsa sot pritet të zhvillohet një analizë e gjatë për ndeshjen e humbur ndaj Flamurtarit, ku nuk përjashtohet mundësia që të kemi paralajmërime për futbollistët, dhe në rast se nuk vjen kthesa në ndeshjen e mesjavës me Tiranën, mund të ketë ndëshkime për ta. Krutanët e nisën mirë sezonin me një fitore në Gjirokastër, ku u duk se do të ishin një kockë e fortë për çdo kundërshtar, por në pesë ndeshjet pasuese arritën të merrnin vetëm një pikë në shtëpi ndaj Laçit në fundjavën e shkuar.

Katër pikë në 6 javë janë shumë pak për një skuadër që kërkon të qëndrojë në mesin e më të mirave. Në ndeshjen e mesjavës krutanët do të presin Tiranën, në një takim që skuadrës së Plorit i duhet patjetër rikthimi te rezultatet pozitive, nëse ka si objektiv qëndrimin në kategori.

Bujar Balliu

NDIQE LIVE "PANORAMA TV"

---