PSG-ja do Zidanin, zbardhen 3 arsyet që e çojnë në Francë
Kanë mbetur 5 muaj nga fundi i këtij se zoni, por që tani po “gatuhen” ato që do të ndodhin në merkaton e verës. Pritjen lëvizje të mëdha të lojtarëve, por edhe të trajnerëve. Sipas gazetës “Sport”, PSG-ja ka nisur kontaktet e para për të afruar Zinedin Zidanin si trajner për sezonin e ardhshëm. Francezi shihet si personi i vetëm që mund të sjellë qetësinë në kampin e PSGsë. Unai Emeri është duke humbur pikë nga viti në vit dhe e ka të pamundur të menaxhojë yjet që ka në skuadër si Nejmar, Kavani dhe Mbape. Situata në dhomat e zhveshjes nuk është shumë e qetë dhe Al Khelaifi mendon se duhet një tjetër trajner për të menaxhuar mirë grupin e lojtarëve.
NJË MENAXHUES – Më shumë sesa një trajner të mirë dhe të përgatitur, drejtuesit e PSG-së mendojnë se u duhet një njeri që të bashkojë grupin dhe t’i bëjë të gjithë të ndihen të rëndësishëm. Kjo figurë sigurisht që mund të jetë Zinedin Zidan, i cili bëri të njëjtën gjë me Realin e Madridit.
Emeri ka kontratë deri në fund të këtij sezoni dhe do të përshëndetet me të gjithë, pavarësisht rezultateve dhe trofeve që mund të fitojë. Al Khelaifi po përgatitet për pasardhësin e tij dhe në Spanjë janë të sigurt se ka pasur kontakte të vazhdueshme gjatë kësaj kohe, nisur edhe nga momenti i vështirë që po kalon Zidan te Reali. Për më tepër, francezi nuk ka raport të shkëlqyer me presidentin Perez dhe kanë pasur përplasje të vazhdueshme për merkaton.
TRE ARSYET- Zinedin Zidan është favorit për të marrë stolin e PSG-së për disa arsye që renditen nga gazeta katalanase “Sport”:
1. Ka fituar dy Champions dhe ky është trofeu i shumëkërkuar nga Al Khelaifi. Ai mendon se Zizu është trajneri i duhur për të sjellë këtë trofe.
2. Ka aftësi të menaxhojë yjet e skuadrës dhe këtë e ka treguar te Reali.
3. Fakti që është francez e shtyn akoma më shumë për të qenë ai trajner i PSG-së. Këta të fundit duan një trajner vendës, por edhe lojtarë. Afrimet e Mbapesë dhe tentativa e fortë për të transferuar Diarranë e tregojnë qartazi këtë gjë. Por Zidan duket se e ka vetë në dorë fatin e tij. Në duelin e Ligës së Kampionëve mes PSGsë dhe Realit do të vendoset shumë edhe për të ardhmen e trajnerëve. Zizu mund të shkaktojë tërmet te PSG-ja, por mund të sigurojë një vend aty për të ardhmen…
GENTJAN ALINANI
NDIQE LIVE "PANORAMA TV"