Pikantet e Dinamo-Teuta/ Tifozët tërbohen me Rexhepin, italiani e… duartroket
“Panorama Sport” ju sjell momentet pikante të ndeshjes mes Dinamos dhe Teutës, e fituar me përmbysje nga durrsakët në “Elbasan Arena”.
– Dy presidentet Ardian Bardhi dhe Edmond Hasanbelliu njihen për miqësinë e tyre, teksa më herët kanë qenë së bashku edhe financues te Teuta. Ditën e djeshme ata qëndruan bashkë gjatë gjithë kohës, madje duke ardhur shumë shpejt në stadium.
– Edi Martini kërkon që në minutën e parë presionin lart nga skuadra e tij, duke u bërtitur të tijve që të qëndrojnë në sulm.
– Tifozët e Dinamos tërbohen me portierin Rexhepi, sepse humb një top në pasim dhe e dërgon në rivënie anësore. Di Biaxho i jep zemër në krahun tjetër, duke e duartrokitur.
– Anësori mërzit në një moment një tifoz të Dinamos, sepse nuk ngre flamurin në një rivënie anësore. “Ngreje atë flamurin mo, për çfarë e ke marrë me vete”, ia behu tifozi dinamovit.
– Di Biaxho kujton kohët si futbollist dhe zhonglon topin në një moment. Tifozët ia kthejnë me ironi: “Bravo, bravo”. – Di Biaxho tërbohet te një ndalesë e lojës për shkak të dëmtimit të një lojtari të Teutës. Kërkon llogari te gjyqtari i katërt, pasi sipas tij aksioni duhet të vijonte, për aq kohë sa nuk kishte faull.
– Portieri Dema në një moment e merr me qetësi rivënien fundore, por është Fili që ia bën me shenjë që të mos e ulë ritmin, por ta nisë lojën shpejt.
– Edi Martini bërtet me të madhe për prekjen e topit me dorë të Behiratçes, ku kërkon penallti. “Është penallti mo”, i bërtiste arbitrit.
– Edhe pse u mundën, në fund lojtarët e Dinamos “ngushëllohen” me pica.
PANORAMASPORT.AL
NDIQE LIVE "PANORAMA TV"