“Dalibor Volas është lojtar i Partizanit. Sulmuesi nga Sllovenia ka arritur akordin me të kuqtë ku ka firmosur me klubin kontratë 1-vjeçare”. Kështu njoftoi klubi kryeqytetas më 7 korrik, menjëherë sapo ekipi u kthye nga Bratislava. Sulmuesi arriti në Tiranë më 11 korrik, pasi ndodhej në Malajzi, por nga dje 29-vjeçari nuk do të jetë më pjesë e “demave të kuq”.

“Panorama Sport” e ka njoftuar që para transfertës së Salzburgut që Dalibor Volash ka bërë gati valixhen për t’u larguar. Shkak për këtë është bërë forma jo e mirë e sulmuesit, i cili për një muaj nuk arriti që të fitojë besimin e stafit teknik, ndonëse pas miqësores me Kamzën sikur dha disa shkëndija në stërvitje.

Pas bisedimeve disa ditore dje palët kanë arritur akordin për të ndërprerë me mirëkuptim bashkëpunimin. Dalibor Volas u mendua se do të ishte zëvendësuesi ideal i bomberit të sezonit të shkuar, Xhevahir Sukajt, por në asnjë rast ai nuk arriti që të afrohet në parametrat e shkodranit.

Kur nënshkroi me Partizanin u tha se slloveni do të përfitojë një rrogë prej 7 mijë eurosh muaj. Asokohe u tha se në momentin e nënshkrimit të kontratës, Volas ka marrë tri rroga paradhënie, që i bie 21 mijë euro. Duke llogaritur datën që u paraqit në Shqipëri, më 11 korrik, i bie që aventura e sulmuesit slloven me Partizanin ka zgjatur 36 ditë.

Sipas një llogarie të thjeshtë matematikore, duke pasur parasysh kohën e qëndrimit dhe shumën paradhënie, i bie që Dalibor Volas i ka kushtuar rreth 580 euro në ditë klubit kryeqytetas. Nuk dihen detajet ndërprerjes së bashkëpunimit. Shuma financiare që u ka kushtuar slloveni “demave” i referohet asaj që u tha në momentin nënshkrimit të kontratës.

Shkaku i largimit

Paraqitja e Volasit në miqësoren e fundit me Kamzën la shumë për të dëshiruar, duke shërbyer si “guri i provës” për të intensifikuar bisedimet për prishjen e marrëveshjes së nënshkruar, në korrik me sulmuesin slloven. Për gjatë muajit të fundit, stafi teknik ka shfaqur pakënaqësi për sulmuesin, i cili erdhi me një CV të pasur, por nuk dha asgjë nga bagazhi i tij. Sulmuesi ka lënë dje Shqipërinë dhe ka udhëtuar drejt familjes së tij në Slloveni, fakt të cilin e ka vërtetuar edhe lojtari përmes një postimi në rrjetet sociale.

Nga Pejiç te Mici, ja blofet e Partizanit në merkato

Merkatoja verore e Partizanit është shoqëruar me oshilacione të shumta, ku nuk kanë munguar edhe blofet. Zgjedhja e gabuar në alternativa apo mosguximi për ndonjë lojtar të veçantë nga Partizani ka bërë që të përfitojnë rivalët kryesor të kryeqytetasve.

Gabimi i parë i Partizanit në merkato nis me Xhevahir Sukaj, pasi drejtuesit nuk insistuan që ta mbanin shkodranin, ndonëse pas kthimit të tij nga Malajzia u tha se ka rinovuar me të kuqtë. Por 24 orë para sfidës me Slovan Bratislavën, Sukaj lejohet që të mos luaj me ekipin sllovak, duke e lënë të lirë të firmoste me Perak në Malajzi.

Blofi i dytë, që mund të peshojë shumë është Dalibor Volas, emri i të cilit u përzgjodh gjatë kthimit të skuadrës nga transferta e Bratislavës. Slloveni ishte në balotazh me Pero Pejiç, pasi klubi paralelisht po bisedonte me dy “pykat”. Në fund u vendos për Volasin, i cili doli “fiasko” brenda një muaji, por që i ka kushtuar klubit shumën që mund të ishte e nevojshme për afrimin e Micit. Me përzgjedhjen e gabuar të kuqtë i bënë “dhuratë” Pejiçit një rival direkt në kampionat, Kukësin.

Gledi Mici është zhgënjimi më i freskët i merkatos së Partizanit. Të kuqtë e kryeqytetit ishin favorit për të marrë shërbimet e fierakut, i cili do të blindonte një pozicion problematik, si krahu i majtë i mbrojtjes. Dëshira e lojtarit ka qenë të vishej i kuq, por edhe klubi kuksian ia afroi Partizanit ofertën për Micin. Por drejtuesit e kuq nuk deshën të përfshihen në marrëveshje me Kukësin, i cili në fund e zbriti në 20 mijë euro plus kartonin e Kalarit që ta linin lojtarin të vishej i kuq.

Drejtuesit e kuq kishin bindje se Micin do ta merrnin falas duke shpresuar që lojtari të dilte i lirë nga Dhoma e Zgjidhjeve të Konflikteve në FSHF. Madje oferta e Kukësit për Partizanin ka qenë deri dje në mesditë, por me mefshtësinë e tyre ata i bënë një asist të bukur rivalit kryesor për titullin kampion, Skënderbeut. Pra, blofet e Partizanit kanë përforcuar rivalët e tyre kryesorë për sezonin e ri. Në ditët në vijim Partizani mund të humbasë edhe ndonjë titullar tjetër.

ILIR CARA

 

NDIQE LIVE "PANORAMA TV"

---