Kategoria e Parë U-17 dhe U-19 / Shkëndija s’fal, ndalet Luftëtari
U-17, Grupi A
Bind skuadra e shkollës “Loro Boriçi”
Shkëndija B. e Tiranës triumfon ndaj Burrelit dhe ngjitet në vendin e katërt, duke lënë pas oshilacionet. Skuadra që përfaqëson shkollën e futbollit “Loro Boriçi” bëri detyrën përballë një kundërshtari, që në përbërje kishte edhe lojtarë 15-vjeçarë.
Pas një pjese të parë të ekuilibruar, e cila përfundoi me shifrat 0-0, në fraksionin e dytë me të nisur loja ishin vendësit që shënuan. Albion Marku kaloi ekipin në avantazh pas një gjuajtje të bukur në afërsi të zonës. Burreli nuk pati forcën e duhur për t’i bërë dëm Shkëndijës.
Në minutën e 77-të është Paulo Gjonaj ai që dyfishon shifrat. Skuadra matjane ka surprizuar me lojën, por i ka munguar finalizimi. 15-vjeçari Lorenc Murra, me disa veprime të bukura teknike, mahniti të pranishmit. Pas golit të dytë, skuadrat u pajtuan me rezultatin dhe, deri në fund nuk pati më histori. Shkëndija pretendon një vend nderi në kampionat.
Abdulla Dushku
Besëlidhja bën “poker” ndaj Kastriotit
Takimi mes paratërinjëve të Besëlidhjes dhe Kastriotit është fituar nga lezhjanët me shifrat 4-2. Loja ka nisur e ekuilibruar, pasi të dyja skuadrat u treguan të kujdesshme. Të parët që rrezikuan dhe kaluan në avantazh ishin futbollistët e Besëlidhjes me anë të Dushkut. Përsëri janë paratërinjtë lezhjanë që e kontrollojnë lojën dhe është kapiteni Xh.Gjergji që dyfishon rezultatin pas një sulmi të shpejtë. Në minutën e 36-të është sërish Xh.Gjergji që trefishon, duke realizuar edhe dopietën e tij dhe dërguar skuadrat në pushim me shifrat 3-0.
Në fraksionin e dytë ndryshon historia, pasi që në nisje loja kontrollohet nga krutanët, të cilët arrijnë të shënojnë me anë të Hoxhës. Përsëri është Hoxha që realizon dopietën e tij, duke sulmuar i vetëm portën vendëse. Pas pësimit të dy golave, Besëlidhja mbledh forcat dhe arrin që të realizojë edhe golin e katërt me anë të Rustës.
Preng Gjikola
U-17, Grupi B
Në Fier s’ka fitues
Nuk ka fitues në ndeshjen e paratërinjve të Apolonisë dhe Luftëtarit. Edhe pse fierakët kanë luajtur mirë dhe kanë krijuar raste të shumta për të shënuar, nuk kanë arritur që të gjejnë rrugën e rrjetës. Gjirokastritët zhvilluan një lojë të kujdesshme dhe me kundërsulm.
Mikel Mbriçaj
Goleadë e elbasanasve
Fieri ka pësuar një tjetër humbje të thellë, këtë herë në fushën e vet me rezultatin 2-5 ndaj ekipit privat elbasanas, Pepa. Edhe pse kanë shënuar të parët, vendësit kanë shfaqur dobësi në aspektin mbrojtës. Për miqtë shkëlqyen me dopietat e tyre Xhani dhe Hida.
Mikel Mbriçaj
U-19, Grupi A
Tension dhe gola, Shkëndija pa frena
Shkëndija B. e Tiranës nuk di të ndalet për të rinj, teksa mposht edhe Burrelin në shtëpi. Pas një fillimi të tensionuar, ndeshja bëhet e bukur dhe me sulme të vazhdueshme nga të dyja skuadrat. Shkëndija ka shënuar dy gola të shpejtë, fillimisht me anë të Xhungës dhe, më pas, me Xhafën. Goli i dytë ka sjellë edhe tensionim, ku ka pasur përplasje mes lojtarëve Kejdi Ndoja dhe Arled Hotit. I pari ka ofenduar dhe gjyqtari ka nxjerrë kartonin e verdhë, e më pas të kuqen. Pas kësaj minute, skuadra e Shkëndijës luan me 10 lojtarë.
Në fraksionin e dytë të dy ekipet kërkojnë golin. Të parët që shënojnë janë vendësit me anë të shtatlartit Kristjan Jaku. Megjithatë, në minutën e 81-të kemi një 11-metërsh për Burrelin, ku Klaudio Mallunxa nuk fal, duke e dërguar topin në rrjetë. Kështu, vendësit kanë fituar 3-1 këtë sfidë me 10 futbollistë që nga minuta e 27-të. Shkëndija kryeson me pikë të plota.
Abdulla Dushku
Kovaçi nderon Besëlidhjen
Të rinjtë e Besëlidhjes morën një fitore të vuajtur ndaj Kastriotit, duke shënuar në fundin e lojës me anë të Kovaçit. Ndeshja ka qenë mjaft e fortë, pavarësisht terrenit të rënduar. Më superiorë ishin të rinjtë e Besëlidhjes, që rrezikuan disa herë portën krutane.
Preng Gjikola
Olimpiku thyen Kamzën
Olimpiku ka triumfuar me Kamzën në fush- ën e kësaj të fundit. Skuadrat kanë sfiduar shiun, që nuk ka reshtur nga minuta e parë e deri në fund të takimit. Ka qenë një lojë më e mirë fillimisht nga kamzalinjtë, por ekipi i Olimpikut ishte më i saktë përpara portës.
Abdulla Dushku
Veleçiku fiton në fund
Një gol në shtesë i ka dhënë fitoren Veleçikut kundër Tiranës B. Ka qenë një lojë e barabartë në pjesën e parë, ku miqtë kaluan në avantazh me Gjinollarin dhe, më pas, Popaj riktheu baraspeshën. Kur mendohej se gjithçka u mbyll 1-1, Kaçaj shënoi golin e fitores.
Esat Ymeri
U-19, Grupi B
Spektakël për një pikë
Apolonia ka ndalur Luftëtarin kryesues, në një ndeshje mjaft të bukur, që prodhoi katër gola. Gjirokastritët kanë udhëhequr deri në minutën e 86-të, por fierakët barazuan, duke marrë një pikë. Loja ka qenë shumë e luftuar nga të dyja skuadrat. Mahmutaj për miqtë bëri dopietë.
Mikel Mbriçaj
NDIQE LIVE "PANORAMA TV"