Kamza në amulli, duhet një ‘mrekulli’ për shpëtimin
Gjendja në klubin e Kamzës është mjaft e nderë, pasi ende nuk ka ndonjë kompromis midis drejtuesve të ekipit. Naim Qarri dhe Xhelal Mziu nuk janë ulur ende në tavolinën e bisedimeve. Edhe një mundësi që ishte para disa ditëve, pas negocimeve të dy bashkiakëve, nuk ka mundësuar ndonjë marrëveshje konkrete. Koha po kalon dhe Kamzës i mbeten vetëm dy ditë për të vendosur përfundimisht fatin e saj për këtë sezon. Ose do të arrihet akordi ndërmjet krerëve të klubit, ose pas së mërkurës Kamza do të përjashtohet nga të gjitha aktivitetet e këtij viti. Përveç kësaj, Kamzës i duhet që vitin e ardhshëm ta rinisë nga Kategoria e Dytë. Dhe e gjithë kjo si pasojë e kokave të nxehta të krerëve kamzalinj.
Situata Bashkia nga ana e saj ka dhënë ultimatumin: ose Qarri të blejë edhe 49% të aksioneve e ta drejtojë ai i vetëm klubin e futbollit, ose ky të dorëzojë 51% të aksioneve të veta, për t’ia blerë bashkia dhe kjo e fundit të jetë zotëruese 100% e klubit. Kjo nuk pranohet nga Qarri, pasi ai ka investuar 6 vite me radhë në këtë klub dhe ka deklaruar hapur se nuk mund të lejojë t’i zotërojë tjetërkush aksionet e tij. Këto janë investime personale dhe presidenti nuk dëshiron të largohet në këtë mënyrë nga klubi. Ndërkaq sot, në orën 11:00, pritet të zhvillohet për herë të fundit takimi mes palëve në FSHF, ku do të vendoset përfundimisht për të ardhmen e Kamzës. Nëse nuk do ketë ndonjë zgjidhje konkrete për të ardhmen e këtij klubi, atëherë FSHF-ja pritet të japë verdiktin e përjashtimit për një vit të ekipit të Kamzës dhe vitin e ardhshëm kjo skuadër do ta nisë nga Kategoria e Dytë. Në rast mosakordit me bashkinë, Qarri ka kërkuar ndihmën e tifozerisë për të protestuar kundër shkatërrimit të këtij klubi.
Skuadra Aktualisht është ndërtuar vetëm një skuadër nga ana e Qarrit. Ky i fundit ka afruar në krye të stolit Sajmir Malkon, në një kohë që rreth 30 futbollistë zhvillojnë çdo ditë stërvitje në kompleksin e ekipeve kombëtare në Kamzë. Megjithatë, kjo skuadër nuk është njohur nga ana e bashkisë.
“Bashkia po bën ‘show’, nuk lejoj shkatërrimin e klubit”
Në lidhje me situatën që është krijuar në klubin e Kamzës, presidenti Naim Qarri shprehet: “Deri tani ende nuk ka ndonjë përgjigje nga ana e kryebashkiakut Xhelal Mziu. Unë gjithnjë kam qenë i hapur për bashkëpunim me të. Edhe pasi negociatorët bashkiakë parashtruan kërkesat e kryebashkiakut, që në vetvete përbënin dorëzimin pa kushte të klubit të Kamzës, nuk ka asnjë zgjidhje. Kjo është absurde për një njeri që hedh miliona nga xhepi i tij. Ende nuk ka ndonjë përgjigje nga ky i fundit, sikur edhe për një takim mes nesh. Nga ana e tyre, më tepër ka qenë një “show” se gjoja negociata, dhe aspak një nismë serioze për të ardhmen e këtij klubi. Unë përfundimisht nuk do të lejoj që klubi i Kamzës të shkatërrohet për tekat e një kryebashkiaku. Për këtë, do të kërkoj ndihmën e qytetarëve të Kamzës, që të vihen në mbrojtje të klubit të futbollit për të mos e humbur shansin që do t’i kushtojë shumë rëndë këtij klubi. U bëj thirrje gjithë tifozëve dhe dashamirësve të këtij klubi, si dhe gjithë qytetarëve të Kamzës, për të kundërshtuar me forcë atë që po ndodh me skuadrën”, përfundon Qarri.
ABDULLA DUSHKU
