Hidhen goglat te Basketbolli, Vllaznia e nis me Apoloninë
Siç ishte parashikuar, është hedhur paraditen e djeshme në zyrat e Federatës Shqiptare të Basketbollit, shorti i kampionatit kombëtar për femra dhe meshkuj 2014- 2015. Në prezencë të sekretarit të përgjithshëm, Korab Llazani, dhe dy anëtarëve të kryesisë, Ilir Taflaj dhe Bashkim Milo, skuadrat pjesëmarrëse u njohën me kundërshtarët e sezonit të ri sportiv. Edhe pse njoftimi ishte bërë për të gjitha klubet, përfaqësimi i tyre ishte në minorancë. Të pranishëm për tërheqjen e goglave ishin Vllazina, Apolonia, Tirana, Partizani dhe Kamza Basket. Ndërsa Superliga për meshkuj e Kategoria e Parë për femra do të nisë më 17 tetor, Kategoria e Parë e meshkujve ngre siparin më 24 tetor. Pak ditë më parë Kryesia e Federatës Shqiptare të Basketbollit përcaktoi 17 tetorin si datën e fillimit të kampionatit kombëtar të rritur/ rritura për sezonin 2014- 2015. Në vendimin e marrë në dijeni të të gjithë klubeve anëtare, Ekzekutivi i basketbollit kërkoi respektimin e të gjitha afateve dhe detyrimeve që rrjedhin nga ky vendim. Përveç konfirmimit të pjesëmarrjes në kampionatet europiane të moshave U-16 (meshkuj/femra), U-18 (meshkuj/femra) dhe U-20 meshkuj, kryesia mori vendim gjithashtu që Apolonia për të rritur të futet në Superligë sipas renditjes së kampionatit të kaluar pas konfirmimit të largimit të UAT-së, si dhe katër ekipet e mbetura të luajnë me sistem vajtje-ardhje për çdo fazë. Ndër vendimet e tjera të marra ishin si vijon: Të ndryshohet neni 4.3 dhe 4.4 i rregullores në lidhje me përcaktimin e numrit të lejuar më i madh se 9; të lejohen lojtarë U-18 të luajnë në më shumë se një ekip brenda së njëjtës shoqatë dhe të licencohen me licencat përkatëse kundrejt tarifës së dyfishuar të parashikuar në nenin 19.f.
Olgert Serani