Gjoza: Të ndryshojë urgjent vendimi për shpërblimet!
Ndonëse i entuziazmuar për katër medaljet e fituara në total Daniel Godelli dhe Romela Begaj me tri të artat dhe një të argjendtë, presidenti i Federatës Shqiptare të Peshëngritjes, Elez Gjoza, në një komunikim për “Panorama Sport” vuri theksin te vendimi i Këshillit të Ministrave. Deri tani nga buxheti i shtetit janë shpërblyer vetëm sportistët e dygarëshit (pra vendi 1-5 në rastin e botërorit), ndërsa medaljet në stilet respektive nuk janë trajtuar financiarisht. Por kjo ka hasur edhe kundërshtimin e peshëngritësve, jo pak herë të ngritur në protesta. Presidenti Gjoza ka kërkuar me çdo kusht rishikim të këtij vendimi. “Realisht, vendimi i Qeverisë është vendim qeverie. Por nuk është e drejtë që të shpallesh kampione bote sikurse rasti i Romela Begajt dhe me këtë VKM të mos shpërblehet. Sapo të vijmë në Shqipëri, federata do t’i propozojë ministrisë që ky vendim të ndryshojë duke i dhënë prioritet edhe medaljeve në stilet përkatëse. Përderisa Romela u ngjit në podium, patjetër që duhet vlerësuar me vlerë monetare. Duhen kthyer me çdo kusht sytë nga këta sportistë, pasi tani është koha dhe olimpiada po na troket”.
