Që prej së martës, fierakët kanë filluar me dy seanca stërvitore në ditë, sepse stafi teknik synon që grupi të arrijë sa më shpejt formën optimale. Pritet edhe rikuperimi i të dëmtuarve, sidomos i Smaçit, i cili ka probleme më të lehta. Skuadra e Mërgjyshit e ka treguar se është nga më të mirat në aspektin fizik, por ka nevojë ende për “t’u rritur” në kontekstin e menaxhimit të 90 minutave, pasi i mungon përvoja e duhur. Stafi teknik po punon fort me grupin aktual, duke mbajtur “një vesh e një sy” nga merkatoja për të pritur përforcime.

GURI – Deri tani, i vetmi që ka nënshkruar me fierakët është kuksiani Ardi Guri. Pjesën e parë të kampionatit 20-vjeçari luajti për Ilirinë, ku regjistron 480 minuta në 8 ndeshje, 6 prej të cilave titullar. Kontrata e mbrojtësit të majtë tek Apolonia është deri në maj, me opsionin e rinovimit 1-vjeçar, nëse kjo skuadër ngjitet në Superiore.

Pas nënshkrimit të marrëveshjes, Guri ka dhënë edhe deklarimin e parë si bardhejeshil për “Panorama Sport”. “Jam i kënaqur që arrita këtë marrëveshje. Apolonia për mua është një ekip cilësor dhe me emër edhe në futbollin elitar shqiptar. Ndihem i emocionuar dhe dua të falënderoj drejtuesit e klubit dhe profesor Mërgjyshin për besimin që kanë ndaj meje. Zgjodha Apoloninë, sepse është një ekip serioz në pretendime dhe që u jep shumë besim të rinjve.

Do të përpiqem në çdo ndeshje të jap maksimumin, duke besuar se në fund të kampionatit do të arrijmë Superioren. Iliria? Është skuadër që e respektoj, do ta dua gjithmonë dhe e falënderoj për atë pjesë që kam kaluar atje, pasi ajo përvojë më ka shërbyer. Tani mendoj për skuadrën time të re, Apoloninë, i uroj edhe Ilirisë shumë suksese”, thotë lojtari më i ri i Apolonisë, Ardi Guri.

 BUJAR RAMA

NDIQE LIVE "PANORAMA TV"

---