Vllaznia duket se ka gjetur menjëherë një nga goditjet më të qëlluara të merkatos së verës. Emiljano Musta nuk ka pasur nevojë për shumë kohë për të treguar vlerat e tij, pasi në ndeshjen e parë zyrtare të sezonit, atë ndaj Malishevës në Conference League, 35-vjeçari ishte ndër futbollistët më të spikatur në fushën e lojës.

Me eksperiencën dhe qetësinë që e karakterizon, mbrojtësi i majtë zhvilloi një paraqitje shumë pozitive, e kurorëzuar edhe me një gol që rezultoi vendimtar në suksesin 2-1 të kuqebluve. Që në minutat e para u pa qartë se Musta i solli një tjetër ekuilibër repartit defensiv të Vllaznisë. Përveç kontributit në prapavijë, ai u shfaq vazhdimisht edhe në fazën sulmuese, duke qenë një alternativë e rëndësishme në ndërtimin e aksioneve. Goli i realizuar ishte shpërblimi i një paraqitjeje të kompletuar, ku eksperienca e fituar ndër vite u vu plotësisht në shërbim të skuadrës së Edi Martinit.

Paraqitja e tij nuk ka kaluar pa u vënë re as nga tifozët shkodranë. Në rrjetet sociale dhe në diskutimet mes mbështetësve kuqeblu, Musta po cilësohet si afrimi më i goditur i kësaj merkatoje deri në këtë fazë të sezonit. Edhe pse sapo ka nisur aventura e tij me fanellën e Vllaznisë, mbrojtësi ka fituar menjëherë besimin e publikut falë sigurisë, personalitetit dhe ndikimit të menjëhershëm në lojën e ekipit. Në fakt, ardhja e Mustës zgjidh një nga problemet më të mëdha që kishte Vllaznia në prag të sezonit të ri.

Pas largimeve të Jagos, Kuros dhe Esin Hakajt, krahu i majtë kishte mbetur një repart që kërkonte ndërhyrje urgjente. Drejtuesit vendosën t’i besojnë eksperiencës së 35-vjeçarit dhe debutimi i tij ka treguar se kjo zgjedhje ka qenë e duhura. Natyrisht, një ndeshje nuk mjafton për të dhënë verdikte përfundimtare, por sinjalet e para janë tepër inkurajuese.

Nëse Musta arrin të ruajë këtë nivel edhe në vazhdim të sezonit, Vllaznia jo vetëm që do të ketë zgjidhur problemin e krahut të majtë, por mund të ketë siguruar edhe një nga futbollistët më të rëndësishëm të skuadrës për objektivat që e presin në kampionat dhe në arenën europiane.

ENDRI ÇINARI – PANORAMASPORT.AL

---