Kërkimi i trajnerit të ri vazhdon të mbe tet prioriteti kryesor i Partizanit në këtë periudhë të merkatos verore. Ndërsa në javët e fundit në kampin e kuq janë përmendur disa alternativa nga tregu ballkanik, zhvillimet e fundit tregojnë se drejtuesit kanë ndryshuar sërish trajektore në përpjekjet për të gjetur teknikun që do të drejtojë skuadrën në sezonin 2026- 2027. Sipas informacioneve të “Panorama Sport”, Partizani është hedhur në sulm për të siguruar shërbimet e një emri të njohur për futbollin shqiptar. Bëhet fjalë për Paolo Tramezzanin, ish-zëvendëstrajnerin e Kombëtares shqiptare gjatë periudhës kur kuqezinjtë drejtoheshin nga Gianni De Biasi.

ITALIANI- Emri i teknikut italian ka hyrë në listën e prioriteteve të drejtuesve dhe kontaktet mes palëve kanë nisur. Tramezzani është një profil që njihet mirë në Shqipëri dhe që gëzon vlerësim për punën e bërë gjatë viteve kur ishte pjesë e stafit të Kombëtares. Aktualisht, trajneri italian është në detyrë dhe drejton skuadrën e femrave të Comos në Itali. Pikërisht ky fakt e bën më kompleks operacionin që Partizani po përpiqet të realizojë. Për të arritur një marrëveshje, drejtuesit e kuq nuk duhet të bindin vetëm trajnerin në aspektin sportiv dhe ekonomik, por edhe klubin italian me të cilin ai ka një kontratë aktive. Megjithatë, pavarësisht vështirësive që paraqet kjo pistë, bisedimet nuk janë ndërprerë. Palët vazhdojnë kontaktet dhe po shqyrtojnë mundësinë e një bashkëpunimi që do ta rikthente Tramezzanin në futbollin shqiptar.

TRAMEZZANI NJEH REALITETIN SHQIPTAR- Një element që luan në favor të Partizanit është fakti se italiani e njeh mirë ambientin shqiptar. Ai ka qenë pjesë e një prej periudhave më të rëndësishme në historinë e Kombëtares dhe ka punuar nga afër me futbollin shqiptar për disa vite. Kjo njohje e realitetit lokal mund të përbëjë një avantazh të rëndësishëm në rast se palët arrijnë të gjejnë gjuhën e përbashkët. Pas largimit nga Kombëtarja shqiptare, Tramezzani ndërtoi një karrierë të pasur në pankinë. Ai ka drejtuar skuadra në kampionate të ndryshme dhe ka fituar eksperienca në mjedise të ndryshme futbollistike.

EKSPERIENCA- Në Zvicër ai ka punuar me Luganon dhe Sionin, duke fituar eksperiencë në një kampionat të organizuar dhe konkurrues. Karriera e tij vazhdoi më pas në Qipro, ku drejtoi APOEL Nikosian, një nga klubet më të rëndësishme të futbollit qipriot dhe me traditë në arenën europiane. Më pas italiani provoi eksperienca të tjera në Itali me Livornon, si dhe në Kroaci me Hajduk Splitin, një tjetër klub me histori të rëndësishme në rajon. Karriera e tij përfshin gjithashtu aventura në Arabinë Saudite me Al-Faisaly, në Kroaci me Istran, në Zvicër me Yverdon-Sport dhe në Qipro me AEL Limassol. Së fundmi ai ka zgjedhur të punojë në futbollin e femrave, duke marrë drejtimin e Comos, por emri i tij vazhdon të mbetet i lidhur me futbollin e meshkujve dhe me projekte ambicioze. Pikërisht kjo eksperiencë e gjerë është një nga arsyet pse Partizani e sheh me interes profilin e tij. Në kampin e kuq po kërkohet një trajner me eksperiencë ndërkombëtare, personalitet dhe aftësi për të menaxhuar presionin e një klubi me objektiva. Partizani synon të lërë pas sezonin e fundit dhe të rikthehet në nivelet më të larta të futbollit shqiptar. Për këtë arsye, zgjedhja e trajnerit konsiderohet vendimtare për të ardhmen e afërt të skuadrës.

PISTAT E TJERA- Megjithatë, drejtuesit nuk po mbështeten vetëm te një alternativë. Edhe pse pista Tramezzani është një nga më të nxehtat e momentit, klubi ka vazhduar paralelisht punën edhe në drejtime të tjera. Në rast se negociatat me italianin nuk sjellin rezultatin e dëshiruar, Partizani nuk do të mbetet pa opsione. Në tryezën e drejtuesve vazhdojnë të jenë të hapura edhe pistat që çojnë drejt tregut ballkanik. Klubi ka kontakte me dy trajnerë të tjerë nga rajoni dhe i ka mbajtur aktive bisedimet edhe me ta. Kjo strategji synon të shmangë humbjen e kohës dhe të sigurojë që procesi i zgjedhjes së trajnerit të përfundojë brenda afateve të planifikuara. Koha mbetet një faktor i rëndësishëm. Fundi i muajit qershor po afron dhe skuadra duhet të nisë përgatitjet për sezonin e ri me një staf teknik të kompletuar. Për më tepër, emërimi i trajnerit do të ndikojë drejtpërdrejt edhe në lëvizjet e merkatos. Drejtuesit dëshirojnë që tekniku i ri të japë mendimin e tij për afrimet që do të realizohen dhe për profilin e futbollistëve që i nevojiten skuadrës. Në këtë mënyrë, ndërtimi i grupit do të bëhet në përputhje me idetë e trajnerit dhe me objektivat që klubi ka vendosur për sezonin e ardhshëm. Për momentin, Paolo Tramezzani mbetet një nga emrat më interesantë në garën për pankinën e Partizanit. Bisedimet vazhdojnë, pista mbetet e hapur dhe ditët e ardhshme pritet të jenë vendimtare për të kuptuar nëse italiani do të jetë ai që do të marrë drejtimin e të kuqve në sezonin 2026-2027. Në të kundërt, Partizani ka gati alternativa të tjera dhe duket i vendosur që shumë shpejt të mbyllë një nga dosjet më të rëndësishme të kësaj vere.

EJGI ÇABELI-PANORAMASPORT.AL

---