Eksperiencat shumë pozitive me afirmimin, por edhe shitjen për shuma të majme jashtë vendit të emrave si Alivoda apo Dodaj, duket se te Vllaznia nxisin sërish të besojnë te futbollistët e rinj edhe këtë sezon. Pavarësisht se synimi në merkato ka qenë afrimi i futbollistëve me eksperiencë dhe që mund të përballojnë presionin e garës, vëmendja nuk humb aspak nga elementi i ri në radhët e kuqebluve.

Që në politikat e klubit e kanë si synim afrimin e një elementi të ri çdo edicion. Dhe futbollistët premtues duket se nuk mungojnë aktualisht në ekipin e drejtuar nga Martini. Duke nisur nga portieri Jukaj, i cili mund të konsiderohet i konfirmuar tashmë pavarësisht moshës së tij vetëm 20 vjeç. Për të vijuar edhe me emra të tjerë Brahimi apo Hajdari në mbrojtje. E dy futbollistë në mesfushë disi më të “spikatur” ku kanë pasur disa minuta në të shkuarën si Tafili e Delaj.

E ndërsa premtues duket se janë edhe Kubazi e Ara në repartin e sulmit, dy futbollistë të bashkuar me ekipin e parë të shkodranëve rishtazi nga akademia kuqeblu. Disa elementë të cilët Martini do t’i studiojë me shumë vëmendje dhe një moment për të bindur shkodranin për cilësitë e tyre, do të jenë ndeshjet miqësore para nisjes së edicionit të ri.

Ku elementi i ri do të jetë qëllimi kryesor për t’i dhuruar minuta dhe vërtetuar vlerat e tyre. Me klubin e Vllaznisë që po analizon me kujdes rritjen e elementit të ri. Ku me krijimin edhe të Vllaznia B, disa futbollistë që ndoshta nuk kanë minutat e duhura me skuadrën e parë, do të kenë hapësirat në skuadrën e dytë. Kjo për të krijuar eksperiencë, por edhe marrë minutazhin që kërkohet nga një futbollist gjatë një sezoni.

PANORAMASPORT.A

---