Dinamo nis mbrëmjen e sotme një tjetër rrugëtim të rëndësishëm në arenën europiane, teksa përballet me skuadrën sllovene të Aluminij në takimin e parë të raundit të dytë kualifikues të UEFA Conference League.

Përballja konsiderohet një nga testet më të rëndësishme të kësaj faze për ekipin kryeqytetas, i cili vjen me objektivin e qartë për të marrë një rezultat pozitiv që në ndeshjen e parë dhe për ta bërë më të lehtë sfidën e kthimit në Tiranë. Dinamo zbret në fushë me statusin e favoritit. Jo vetëm për shkak të cilësisë së organikës dhe eksperiencës së krijuar në vitet e fundit në Europë, por edhe sepse skuadra shqiptare ka treguar se di të menaxhojë ndeshje të këtij niveli.

Objektivi nuk është thjesht të shmanget humbja, por të merret një fitore që do t’i jepte qetësi ekipit për 90 minutat e kthimit. Në kampin blu ekziston bindja se diferenca duhet të krijohet që në takimin e parë. Një sukses në transfertë do t’i lejonte Dinamos të administronte më mirë ndeshjen e kthimit para tifozëve të saj, duke shmangur presionin që zakonisht sjell një duel i hapur deri në minutat e fundit. Pikërisht për këtë arsye pritet një skuadër që do të kërkojë të kontrollojë ritmin e lojës, të ketë zotërimin e topit dhe të godasë në momentet e duhura.

Nga ana tjetër, Aluminij mbetet një kundërshtar që nuk duhet nënvlerësuar. Skuadrat sllovene karakterizohen nga organizimi taktik, disiplina dhe intensiteti fizik, elementë që mund ta bëjnë ndeshjen të luftuar. Megjithatë, në letër dhe sipas pritshmërive, Dinamo konsiderohet ekipi me më shumë cilësi individuale dhe me potencialin për të marrë rezultatin që kërkon.

MOTI- Një nga faktorët që pritet të ndikojë pozitivisht në cilësinë e lojës është moti. Ndryshe nga temperaturat e larta që kanë shoqëruar Tiranën gjatë ditëve të fundit, kushtet atmosferike në Maribor janë shumë më të favorshme për futboll. Në mbrëmje temperatura pritet të zbresë deri në rreth 16 gradë Celsius, duke krijuar një klimë ideale për zhvillimin e një ndeshjeje me intensitet të lartë. Ajri i freskët pritet të ndihmojë futbollistët të ruajnë ritmin gjatë gjithë 90 minutave, ndërsa lodhja fizike nuk pritet të jetë një faktor përcaktues siç ndodh shpesh në ndeshjet e luajtura në temperatura të larta. Për një skuadër si Dinamo, që synon të ushtrojë presion dhe të qarkullojë shpejt topin, kushtet atmosferike mund të rezultojnë një avantazh i rëndësishëm.

STADIUMI- Edhe vendi ku zhvillohet ndeshja ka historinë e tij. Aluminij nuk do të luajë në stadiumin e vet, pasi impianti i klubit nuk plotëson kriteret e licencimit të UEFA-s për ndeshje ndërkombëtare. Për këtë arsye sfida do të zhvillohet në stadiumin “Ljudski Vrt” të Mariborit, një nga impiantet më të njohura dhe me më shumë traditë në futbollin slloven. Ky detaj mund të ketë ndikim edhe në rrjedhën e takimit. Aluminij humbet avantazhin e fushës së vet, ambientin ku është mësuar të luajë çdo javë dhe mbështetjen e plotë të tifozëve vendas. Edhe pse nuk do të jetë një transfertë e largët për skuadrën sllovene, atmosfera në Maribor është krejtësisht ndryshe nga ajo që do të krijohej në stadiumin e Aluminij. Nga ana tjetër, Dinamo mund ta shohë këtë si një element në favorin e saj. Të luash në një stadium neutral, pa presionin e një publiku të zjarrtë vendas dhe në një impiant me standarde të larta, mund të ndihmojë ekipin shqiptar të shfaqë më qetë cilësitë e tij. Për më tepër, fusha e “Ljudski Vrt” është e njohur për kushtet shumë të mira të lojës, duke favorizuar skuadrat që ndërtojnë aksione dhe kërkojnë të mbajnë kontrollin e topit.

ERJON ALLARAJ-PANORAMASPORT.AL

---