Gjashtë ndeshje, duke përfshirë takimin që do të zhvillohet të enjten me Laçin, ka luajtur në “Niko Dovana”, këtë sezon ekipi i Tiranës. Më parë në Durrës është përballur dy herë me Teutën, më pas me Egnatian, Bylisin, Elbasanin dhe tani me kurbinasit.

Një ndeshje e shtatë është planifikuar me Vllazninë po në këtë stadium, të martën e ardhshme por si pritëse. Skuadra fituar një ndeshje, ka barazuar dy të tjera si dhe është mundur po dy herë nga të zotët e shtëpisë, “Djemtë e detit”.

Tirana do të luajë të enjten ndaj Laçit në një ndeshje ku nëse edhe barazon, i kandidon bardheblutë për rënien direkte nga kategoria. Skuadra në sfidën me kurbinasit do të kenë mungesën e Ismajlit, i cili është i dëmtuar dhe ka mbyllur sezonin. Problemi tjetër i Tiranës është Abel Abah.

Futbollisti ka probleme në gju dhe nuk do të jetë në këtë sfidë. Shkëmbi ka zgjedhur një 3-5-2, me dyshen e sulmit Zharmuni-Ernest. Pjesa tjetër nuk do të ndryshojë nga sfida e fundit e luajtur në Elbasan ndaj Dinamos.

Në portë e nis Selmani, më pas, Meta, Dembele, Kola. Në mesfushë, Vera, Marku, Soler, Rafael dhe Përgjoni. Sulmi tashmë dihet. Të gatshëm, Ndreca, Prengaj e me radhë, ndërsa për t’u shënuar që pas shumë javësh kthehet në stërvitje Rimal Haxhiu. Ky i fundit kishte kohë që përgatitej në mënyrë individuale.

PANORAMASPORT.AL

---