Skënder Gega ka ardhur te Partizani, duke sjellë ndryshime në vendosjen e skuadrës dhe në emra, por jo vetëm kaq. Ai ka vendosur të bëjë disa ndryshime edhe në stafin teknik, që e asiston çdo ditë në stërvitje dhe në ndeshje.

Aldo Duro dhe Oriand Abazaj janë dy emrat e rinj që i janë bashkuar Gegës pas emërimit të tij. Të dy vijnë nga familja e kuqe, pasi punojnë edhe në sektorin e akademisë, ku Aldo Duro ka drejtuar ekipin U-17. Ky i fundit ka marrë rolin e zëvendëstrajnerit, ndërsa Abazaj, përveç aspektit taktik, do të ndihmojë edhe në përgatitjen atletike, diçka që e zotëron dhe e praktikon prej kohësh.

Në sy bie fakti se, pas afro katër vitesh, Renaldo Kalari nuk është më pjesë e stafit të Partizanit. Ish-mbrojtësi ka qenë në stafin e Ilir Dajës dhe të gjithë atyre që kanë pasuar tiranasin. Tashmë ai do të mbajë vetëm drejtimin e Partizanit B, që nuk arriti të ngjitej direkt në Kategorinë e Tretë, por do të duhet të luajë “play off” me të renditurat poshtë në Kategorinë e Dytë.

Të kuqtë, pavarësisht se kishin aktivizuar disa lojtarë të ekipit të parë, u mposhtën minimalisht nga Eagles, që siguroi ngjitjen direkte në të Dytën. Partizanit i bëhet rruga më e gjatë dhe shpresohet që objektivi të arrihet. Të kuqtë kërkojnë Katëgorinë e Dytë jo për ambicie, por sepse aty do të ndihmonin më shumë në promovimin apo rritjen e lojtarëve për ekipin e parë.

DENIS LALA – PANORAMASPORT.AL

---