Teuta ka nisur me vendosmëri ndërtimin e skuadrës për sezonin e ri, duke dhënë sinjale të qarta se synimi i klubit është të rikthehet mes ekipeve pretendente të kampionatit. Pas një sezoni ku skuadra tregoi stabilitet dhe arriti të krijojë një bazë të rëndësishme, drejtuesit kanë vendosur të vazhdojnë mbi themelet ekzistuese, duke shtuar elementë cilësorë që do ta rrisin nivelin e ekipit. Afrimi i parë i verës për blutë është mbrojtësi i djathtë Abdurrahman Fangaj. Futbollisti, i cili ka zhvilluar disa sezone shumë të mira me Egnatian, rikthehet sërish nën urdhrat e trajnerit Tetova.

Megjithatë, merkatoja e Teutës nuk pritet të ndalet këtu. Gjatë ditëve të fundit janë përfolur shumë emra që mund t’i bashkohen ekipit durrsak, por deri tani klubi nuk ka nxituar të zyrtarizojë asnjë lëvizje tjetër. Burime pranë klubit bëjnë me dije se puna po zhvillohet me kujdes maksimal, pasi objektivi është të afrohen futbollistë që përshtaten me projektin dhe filozofinë e trajnerit, duke shmangur lëvizjet e nxituara. Drejtuesit janë të vetëdijshëm se sezoni i ardhshëm do të jetë shumë konkurrues dhe për këtë arsye po kërkojnë të ndërtojnë një ekip të balancuar në çdo repart. Synimi është që skuadra të mos luftojë thjesht për mbijetesë apo për një pozicion në mesin e tabelës, por të jetë një kundërshtar i fortë për çdo ekip dhe të synojë vendet e para të renditjes.

Java në vijim pritet të jetë mjaft intensive në kampin blu. Sipas planit të klubit, disa afrime të tjera cilësore pritet të finalizohen shumë shpejt, në mënyrë që trajneri Tetova të ketë në dispozicion pjesën më të madhe të grupit që në nisje të përgatitjeve. Ekipi do të rikthehet në fushë më 22 qershor, datë kur do të startojë zyrtarisht faza përgatitore për sezonin e ri. Objektivi i drejtuesve është që deri në momentin e nisjes së fazës përgatitore skuadra të jetë rreth 90 për qind e kompletuar.

Kjo do t’i japë mundësi stafit teknik të punojë me grupin pothuajse të plotë, duke krijuar automatizmat e nevojshëm dhe duke përgatitur ekipin në aspektin fizik, teknik dhe taktik. Një nga lajmet më pozitive për tifozët e Teutës mbetet ruajtja e bërthamës së sezonit të kaluar. Pjesa më e madhe e lojtarëve që mbajtën peshën kryesore të ekipit do të vazhdojnë të jenë pjesë e projektit edhe në sezonin e ri. Kjo vazhdimësi konsiderohet një avantazh i madh, pasi skuadra nuk do të jetë e detyruar të nisë gjithçka nga e para, siç ndodh shpesh me ekipet që pësojnë ndryshime të shumta gjatë verës.

Ruajtja e grupit ekzistues, e kombinuar me afrimet e planifikuara, krijon optimizëm në kampin blu. Brenda klubit ekziston bindja se me disa përforcime cilësore dhe me harmoninë që tashmë është krijuar në skuadër, Teuta mund të ndërtojë një ekip të fortë dhe konkurrues. Në Durrës po punohet në heshtje, por me objektiva të qarta. Klubi nuk dëshiron të bëjë premtime të mëdha, por veprimet e deritanishme tregojnë se po ndërtohet një projekt serioz. Tifozët presin me interes lëvizjet e radhës në merkato, ndërsa atmosfera që po krijohet lë të kuptohet se Teuta dëshiron të rikthehet fuqishëm dhe të jetë një nga skuadrat protagoniste të sezonit të ardhshëm.

PANORAMASPORT.AL

---