Refuzon sulmuesi i Interit, Magani me sytë nga Latif
Teuta do të luajë sot ndeshjen e radhës miqësore në tokën italiane dhe kundërshtar do të ketë ekipin e San Marinos që luan në kampionatet inferiore vendase. Një ndër lojtarët që pritej me interes në këtë përballje ishte edhe sulmuesi në pronësi të Interit, Ze Turbo.
Por, kalimi i tij te durrsakët nuk do të realizohet për shkak se ai ka treguar kërkesën e klubit durrsak, për të qenë pjesë e tyre në sezonin e ardhshëm. Por, pavarësisht këtij dështimi, drejtuesit e klubit vazhdojnë të jenë në kërkim të një tjetër lojtari që do të japë garanci në repartin e avancuar.
Me skuadrën po stërvitet aktualisht ganezi Latif, për të cilin pritet që të vendoset në ndeshjen e radhës. Stafi teknik ende nuk është shumë i vendosur për të ardhmen e futbollistit, që deri diku ka bërë një paraqitje të mirë me skuadrën. Për këtë arsye, trajneri Magani është duke i dhënë mundësi që të shfaqë vlerat e tij që më pas t’i ofrojë një kontratë për sezonin e ardhshëm.
PROVA – Ndërkohë që sot, te Teuta parashikohet të mbërrijë një tjetër lojtar afrikan, i cili do të jetë në provë nën urdhrat e trajnerit Magani. Emri i futbollistit nuk është bërë me dije, pasi pritet që më parë ai të dalë në stërvitje. Sipas të gjitha gjasave, trajneri Magani do ta provojë futbollistin në ndeshjen e e sotme miqësore, por një gjë e tillë nuk është konfirmuar.
Sulmi vazhdon të mbetet një nga pikat e dobëta të Teutës dhe në rast se drejtuesit nuk duan të nxitohen në zgjedhjen që do të bëjnë. Ata gjithashtu po shohin nga afër edhe lojtarë që luajnë në ekipet e kategorive të ulëta në Itali, për të marrë ndonjë element cilësor.
Afrimi i një sulmuesi potent, pothuajse do të mbyllte merkaton e durrsakëve, të cilët kanë një organikë pothuajse të kompletuar. Megjithatë, do të mbetet për t’u parë se cili do të jetë lojtari që do të bindë trajnerin Magani dhe drejtuesit e klubit që t’i ofrojnë një kontratë.
Jeton Rexhmati
NDIQE LIVE "PANORAMA TV"